अर्थ विविध

सुधीर बस्नेतका नाममा अदालतमा ८० मुद्दा, यसरी ठगिएका थिए सर्वसाधारण

काठमाडौं, १३ पुस — घरजग्गा कारोबारी सुधीर बस्नेत मंगलवार राति काठमाडौंको धापासीस्थित आफ्नै घरबाट पक्राउ परेका छन् । उनी पक्राउ परेसँगै काठमाडौं जिल्ला अदालतले उनीमाथि परेका मुद्दा र उनले पाउने कारवाहीका बारेमा हिसाबकिताब निकाल्न थालेको छ ।

जिल्ला प्रहरी कार्यालय काठमाडौं, प्रहरीको अपराध नियन्त्रण ब्युरो तथा काठमाडौं जिल्ला अदालतको फैसला कार्यान्वयन इकाइको समूहले उनलाई घरमा सुतिरहेकै अवस्थामा मंगलवार बेलुका पक्राउ गरेको थियो । विभिन्न व्यक्ति तथा संस्थाहरूलाई ठगेर बस्नेत भारतमा लुक्दै आएका थिए ।

आफूले सञ्चालन गरेको सहकारी र विभिन्न बिल्डर्स कम्पनीहरूमार्फत उनले सर्वसाधारणलाई ठगेका थिए । बैंकिङ प्रणालीबाट उनले लिएको एक अर्ब ६० करोड ऋण समेत उनले चुक्ता गर्न सकेका छैनन् । यसबाहेक विभिन्न व्यक्तिहरूको ७ अर्ब रुपैयाँ उनले ठगेको आरोप लागेको छ ।

काठमाडौं जिल्ला अदालतका फैसला कार्यान्वयन इकाइका प्रमुख सन्तोष पराजुलीले बस्नेतमाथि विभिन्न प्रकृतिका थुप्रैखाले मुद्दाहरू रहेको बताए । ‘उनी पक्राउ परेसँगै उनीसँग सम्बन्धी सम्पूर्ण मुद्दा र उनले पाउने सजायको निर्क्योल गर्दै छौं,’ पराजुलीले लोकान्तरसँग भने, ‘अहिलेसम्म उनले चारवटा मुद्दामा कैद तथा रकम असुलीको सजाय पाएका छन् ।’

पराजुलीले बस्नेतमाथि ८० वटा देवानी तथा फौजदारी प्रकृतिका मुद्दाहरू रहेको बताए । ‘आफ्नो सहकारी र विल्डर्स कम्पनीमार्फत सर्वसाधारणलाई ठगेका मुद्दाहरू थुप्रै छन्,’ उनले भने, ‘केही मिसिलहरू त पुनरावेदन पनि गएका छन् ।’

उनले काठमाडौं जिल्ला अदालतले फैसला गरेको एउटा मुद्दामा ६ महिना कैदको सजाय पाएका छन् । त्यस्तै अर्को एउटामा दुईवर्ष कैद र पाँचकरोड एकानब्बे लाख असुलीको सजाय पाएका छन् । ‘अरू दुईवटा मुद्दामा सफाइ पनि पाएका थिए,’ पराजुलीले लोकान्तरसँग भने, ‘अहिले त उनीमाथिका मुद्दा र सजायको बारेमा एकिन बताउन सक्ने अवस्था छैन ।’

उनी माथि ठगी, जालसाजीका मुद्दा धेरै परेका छन् । उनले काठमाडौंको मैतीदेवीमा सञ्चालन गर्ने ओरेन्टल सहकारीमार्फत सर्वसाधारणलाई ठगेका थिए । त्यस्तै घरजग्गा र अपार्टमेन्टको नाममा पनि सर्वसाधारणलाई ठगेका थिए ।

उनले सञ्चालन गरेको सहकारी ओरेन्टलबाट ठगिएकी काठमाडौंकी गीता दाहालले आफूले बचत गरेको २२ लाख ७ हजार रुपैयाँ उनको सहकारीले डुबाएको बताइन् । २०७० सालमा बस्नेतले सञ्चालन गरेका घरजग्गाका कम्पनीहरू टाट पल्टिएपछि सर्वसाधारणको लगानी सहकारीमा फसेको हो ।

‘त्यसबेला बजारमा १० प्रतिशत ब्याज आउँथ्यो, उनको सहकारीले १३ प्रतिशत ब्याज दियो अनि हामी त्यता लोभियौं,’ उनले लोकान्तरसँग भनिन्, ‘तर उनले सहकारीमा जम्मा भएको सबै पैसा घरजग्गामा लगाएर हामीलाई डुबाए ।’ उनका अनुसार उनलाई ऋण दिन बैंकहरूले त उनको धितो लिलाम गराउँछन्, गराइरहेका छन् ।

तर उनीबाट ठगिएका सर्वसाधारणले समाउने ठाउँ छैन । दाहालका अनुसार बस्नेत डुब्दै गएपछि पहुँच पुग्ने मान्छेहरूले सहकारीमा भएको रकम फिर्ता ल्याएका थिए । तर पहुँच नपुग्नेहरूले सो समयमा रकम फिर्ता पाएनन् ।

ओरेन्टलले काठमाडौंका विभिन्न ठाउँमा शाखा विस्तार गरेर कारोबार गरेको थियो । बस्नेतको सहकारी डुबेसँगै त्यसबेला मानभवनको शाखामा काम गर्ने म्यानेजरले आत्महत्या नै गरेका थिए ।

उनले आरेन्टल बिल्डर्स, आयुसा बिल्डर्स, कोहिनूर बिल्डर्स, कोहिनूर हिल हाउजिङ, रोसिडेल डेभलपर्स, बीबी नेपाल टे«ड कन्सर्न, दिपाज बिजनेस कन्सर्न लगायतका संस्थाहरू चलाउँदै आएका थिए । यी संस्थाहरूबाट घरजग्गा तथा अपार्टमेन्टहरू बेच्ने बाहनामा उनले सर्वसाधारणहरूको करोडौं रकम लिएर डुबाएका छन् । सर्वसाधारणहरूको ७ अर्बभन्दा बढी रकम डुबाएको अनुमान गरिएको छ ।

उनले यी संस्थाहरूको नामबाट विभिन्न बैंकहरूबाट लिएको रकम समेत तिर्न सकेका थिएनन् । उनले विभिन्न बैंकबाट एक अर्ब ६० करोड रकम ल्याएर फसाएका छन् ।

काठमाडौं प्रहरी कार्यालयका निमित्त कार्यालय प्रमुख एसपी प्रद्युम्न कार्कीले बस्नेतलाई अदालतमा हाजिर गराएपछि अरू मुद्दाहरू पनि अघि बढ्ने बताए । ‘हामीले ऊ घर आएको सूचना पाएका थियौं, त्यही अनुसार पक्राउ गरिएको हो,’ कार्कीले भने, ‘अदालतमा हाजिर भएसँगै अरू मुद्दाहरू पनि अघि बढ्छन् ।’

कार्कीका अनुसार बस्नेतलाई अदालतले यसअघि नै कैद सजाय सुनाएको छ । फैसला भएका मुद्दामा उनले सजाय पाउनेछन् भने अरू मुद्दाहरू पनि अब अघि बढ्ने उनले जानकारी दिए । बस्नेतलाई बुधवार नै डिल्लीबजारस्थित कारागार चलान गरिएको छ ।

बस्तेत पक्राउ परेपनि सर्वसाधारणको डुबेको रकम कसरी उठ्छ भन्ने प्रश्न भने अनुत्तरित छ ।

  •  तस्वीर स्रोत : नागरिक दैनिक/ यसअघि फोटो स्रोत खुलाउन छुटाएकोमा क्षमा चाहन्छौंं।
पुस १३, २०७३ मा प्रकाशित

विशाल भट्टराई

विशाल भट्टराई लोकान्तर डट कमका विशेष संवाददाता हुन् ।

लेखकबाट थप...

प्रतिक्रिया दिनुहोस