Ruslan
Tata /sipradi
Nic Asia

छापामा

पृथ्वीजयन्ती मनाउन सरकारलाई दबाब, प्रचण्डले भने- चाँडै निर्णय लिन्छु

काठमाडौं, २५ पुस-२७ पुसलाई पृथ्वीजयन्तीका रूपमा मनाउन र सार्वजनिक बिदा दिन सरकारमाथि दबाब बढेको छ । सरकारमै सहभागी राप्रपाले मन्त्रिपरिषद् बैठकमा पृथ्वीजयन्तीमा सार्वजनिक बिदा दिनुपर्ने प्रस्ताव लैजाने तयारी गरेको छ । प्रमुख दलका शीर्ष नेतालेसमेत सार्वजनिक बिदा दिनुपर्ने धारणा व्यक्त गरेपछि प्रधानमन्त्री पुष्पकमल दाहाललाई दबाब परेको आजको नयाँ पत्रिकामा खबर छ |prithivinarayan

पछिल्लो राजनीतिक गतिरोध अन्त्यका लागि आइतबार सभामुखको कार्यकक्षमा बसेको पाच दलका शीर्ष नेताको बैठकमा शीर्ष नेताहरूबीच २७ पुसमा सार्वजनिक बिदा दिने विषयमा चर्चा चलेको थियो । बैठक चलिरहेका वेला राप्रपाका प्रमुख सचेतक दिलनाथ गिरीलगायतका नेता शीर्ष नेताहरूलाई पृथ्वीजयन्तीका अवसरमा आयोजना गरिएको चियापान कार्यक्रममा निमन्त्रणा दिन सभामुखको कार्यकक्ष पुगेका थिए । त्यहाँ उनीहरूले २७ पुसको चियापानका लागि सहभागी हुन प्रधानमन्त्री प्रचण्ड, कांग्रेस सभापति शेरबहादुर देउवा, एमाले अध्यक्ष केपी ओली, एमाले वरिष्ठ नेता झलनाथ खनाललगायतलाई निमन्त्रणा दिए ।

राप्रपा नेता गिरीका अनुसार चियापानको निमन्त्रणा दिएपछि पूर्वप्रधानमन्त्रीसमेत रहेका एमाले वरिष्ठ नेता खनालले प्रधानमन्त्रीतर्फ संकेत गर्दै ‘यसपटक त बिदा दिनुपर्‍यो है के हुँदै छ’ भनेर सोधे । खनालको भनाइमा सहमति जनाउँदै कांग्रेस सभापति देउवाले भने, ‘२७ पुसमा सार्वजनिक बिदा दिने विषयमा मेरो सहमति छ ।’ त्यसपछि एमाले अध्यक्ष ओलीले पनि पृथ्वीजयन्तीमा सार्वजनिक बिदा दिनु उपयुक्त हुने धारणा व्यक्त गरे ।
शीर्ष नेताहरूका कुरा सुनेपछि राप्रपा नेता तथा आपूर्तिमन्त्री दीपक बोहराले प्रधानमन्त्रीसमक्ष प्रस्ताव राखे, ‘सबै नेताहरू यहीँ हुनुहुन्छ, सकारात्मक हुनुहुन्छ । निर्णय गरौँ प्रधानमन्त्रीज्यू ।’ अन्तिममा बोलेका प्रधानमन्त्रीले भने, ‘म यसबारेमा चाँडै निर्णय लिन्छु ।’ सोमवार, पौष २५, २०७३ मा प्रकाशित

प्रतिक्रिया दिनुहोस

ncell
Shivam