ambe

फिचर

‘लादालाम’को सम्झनामा धुर्मुस, दिपकराज र मनोज : कलाकारले स्वास्थ्यको ख्याल गरौं

काठमाडौं, २५ मंसिर– नेपाल टेलिभिजनबाट केही समयअघिसम्म प्रसारण हुने टेलिचलचित्र तितो सत्यका कलाकार आरपी (रुद्रप्रसाद) भट्टराई शुक्रवार बिहान मृत भेटिए । डाक्टरहरूले उनको मृत्यु हृदयघातबाट भएको पुष्टि गरे । ठुलो शरीर भएकै कारण पनि उनलाई हृदयघात भएको डाक्टरहरूको भनाई रह्यो । उसो त आरपी भटराईले आफन्तजन र साथीहरूलाई समेत बेलाबेला ‘म मेरो शरीरकै कारण जान्छु होला’ भन्ने गरेको उनका समकक्षी कलाकारहरू बताउँछन् ।

आरपी राजधानीमा हुने गाईजात्रा महोत्सव तथा राजधानीबाहिर हुने विभिन्न महोत्सवहरूको व्यवस्थापकका रूपमा समेत काम गर्ने गर्थे । उनले चर्चिच हाँस्य चलचित्र ६ एकाने ६ र वडा नंम्बर ६ मा प्रोडक्सन म्यानेजरका रूपमा समेत काम गरेका थिए । आरपीले ५२ घुस्सा ५३ ठक्कर नामको टेलिफिल्ममा समेत अभिनय गरेका थिए । यसका अलावा उनले दर्जनौं चलचित्रमा काम गरेका थिए । उनी दुई सन्तानका पिता थिए ।

नेपाली हाँस्यक्षेत्रका सक्रिय कलाकार आरपी शुक्रवार बितेपछि उनका बारेमा सामाजिक सञ्जालमा समेत समवेदना र श्रद्धाञ्जली प्रकट भएका छन् । यसै मेसोमा लोकान्तरका प्रकाश आस्थाले नेपाली हाँस्यकलाकारिता क्षेत्रका तीन चर्चित अनुहार दिपकराज गिरी, मनोज गजुरेल र सिताराम कट्टेल धुर्मसलाई आरपीसँगका सम्झना साट्न आग्रह गरेका थिए : 
 
खानपिनमा खुब शौखिन थियो : दिपकराज गिरी

मैले उसँग करिब दशवर्षजति काम गर्न पाएँ । अब त उ गइगयो । ६२ सालबाट उ हाम्रो तितोसत्यमा टिममा आएको हो । उसो त उसले थुप्रै हाँस्यगीतहरू समेत गाएको छ । उसँगका सम्झना धेरै छन् । उ मेरो प्यारो भाइ थियो । फिल्म तथा टेलिफिल्मको सुटिङमा कुनै गडबड हुनेवित्तिकै उसले नै मलाई जानकारी दिन्थ्यो । रातको १२ बजे कुनै काम पर्‍यो, आउनुपर्यो भने पनि उ आइपुगिहाल्थ्यो । कहिल्यै उसले मेरो कुनै आग्रहलाई नाइँ भनेन ।

तर उसको एउटा नराम्रो बानी थियो । उ सुखका कुरामात्र भन्थ्यो । दुःखका कुरा साटासाट नगर्ने । आपत् परेमा मात्रै आफ्ना दुःख र कष्टका कुरा साट्
थ्यो । उसलाई खानपानमा विशेष रुचि थियो जबकि त्यति ठूलो शरीर भएको मान्छेले थोरै खानु उचित हुन्थ्यो । उसले आफूलाई पथपरहेजमा राख्नुपथ्र्यो । शरीरलाई उसले नियन्त्रण गर्न सकेन ।

धर्तीमा सबैको आ–आफ्नो उद्देश्य हुन्छ । उ पनि यहाँ एउटा उदेश्यका लागि आएको थियो गयो । अब हामीले पनि उसबाट केही सिक्नुपर्छ । धेरै कलाकारहरूको बेलुकाको खाना नै ठिक छैन । कलाकारहरूले आफ्नो शरीरको ख्याल नै गरेका छैनन् । शारीरिक अभ्यास कम गरेका छन् । स्वस्थ्य शरीरबिना कसरी स्वास्थ्य मनोरञ्जन प्रदान गर्न सकिन्छ भन्ने कुरा ख्याल गर्नुपर्यो ।

हाँस्य कलाकारमात्र होइन, राजनीतिक प्राणी पनि : मनोज गजुरेल

म उनलाई भान्जाका नामले सम्बोधन गर्थे किनकि कलाकारिता क्षेत्रमा मेरो कोही पनि साथी छैनन् । सबै सम्बन्धी छन् । जस्तो कि ः दिपकराज गिरी ज्वाइँ, बद्री पंगेनी ज्वाइँ, जितु नेपाल र सिताराम कट्टेल भान्जा । मेरो र उनको भेट प्राय गाईजात्रा महोत्सवमा हुन्थ्यो । राजधानीबाहिर हुने धेरै महोत्सवहरूमा उनले व्यवस्थापनको जिम्मा लिने भएकाले पनि आरपीजीलाई म भेटिरहन्थें ।

उनी मिलनसार थिए । उनको चिन्ता प्राय हाँस्यव्यंग्य क्षेत्रलाई जिम्मेवार बनाउनुपर्छ भन्ने थियो । केवल हँसाउनुमात्र भन्दा त्यसमा केही सन्देश समेटियोस् भन्ने उनको चिन्ता थियो । उनी राजनीतिक रूपमा समेत सचेत थिए । उनलाई गुमायौं हामीले तर उनको मृत्युबाट अरू कलाकारहरूले समेत सोच्नुपर्छ ।

कलाकारहरूले पनि आफ्नो जीवनको व्यवस्थापन गर्नुप-यो । योग, अध्यात्म, खानपान, शारीरिक स्वास्थ्य र सम्बन्धको स्वास्थ्यलाई समेत कलाकारले ध्यान दिनु आवश्यक छ । अरूलाई हँसाउने हामी कलाकारहरूले आफूलाई पनि भित्रैदेखि हँसाउने बनाउनु प¥यो ।

मिलनसार मान्छे हुनुहुन्थ्यो : सिताराम कट्टेल धुर्मस

आरपी दाइसँग मेरो सम्बन्ध घनिष्ट थियो । उनलाई सबैभन्दा पहिले मैले काठमाडौंको थापागाउँमा भेटेको हुँ । भाइ कुमार कट्टेल (जिग्री)ले उनलाई कोठमा बोलाएका थिए । तितोसत्यमा गेष्ट रोलमा मैले खेल्दाखेरी उहाँलाई भेटिरहेको हुन्थें । ६ एकाने ६ र वडा नम्बर ६को चलचित्रमा काम गर्दा हामी महिनौं सँगै हुने गथ्र्यौं । उहाँलाई खानामा अलि बेसी रुचि थियो ।

उहाँ मसँग ‘तपाईँसँग एकदमै धेरै प्रतिभासाली हुनुहुन्छ , मपनि तपाईँजस्तै हुन पाए ’ भन्नुहुन्थ्यो तर मैले उहाँलाई संसारमा सबैको आआफ्नो भूमिका हुने र नेपालको कलाकारितामा तपाईँको बेग्लै भूमिका छ भनेर भन्ने गर्थें । शुक्रवार एक मित्रले बिराटनगरबाट फोन गरेर आरपी दाइ बितेको बताएपछि म छहराबाट खसेझैं भएँ । उहाँको आत्माले शान्ति पाओस् । शनिवार, मंसिर २५, २०७३ मा प्रकाशित

प्रतिक्रिया दिनुहोस

Shivam