shivam
Nerolac and Nepal life

खोज

अडिटरको कालो धन्दा : २ करोडको नक्कली भ्याट बिल विक्री गर्ने फर्ममा राजश्वको छापा


काठमाडौं, १७ जेठ
–राजस्व अनुसन्धान विभाग काठमाडौंको टोलीले वीरगञ्ज आदर्शनगरस्थित एक अडिट फर्ममाथि छापा मारेको छ । प्रदीपकुमार बर्माको नाममा दर्ता गरिएको व्यक्तिगत अडिट फर्मले करीव २ सय करोड रुपैयाँ बराबरका नक्कली भ्याटबिल बनाई विक्री गरेको विभागको अनुसन्धानबाट खुलेको छ ।

नक्कली भ्याट बिल बनाई ठूला उद्योगहरूलाई बिक्री गरेको आरोपमा विभागले गत शनिवार छापा मारेको हो । नक्कली भ्याट बिल बनाएर विक्री गरेको भेटिएपछि उक्त फर्मको कागजात नियन्त्रणमा लिई अनुसन्धान थालिएको विभागका महानिर्देशक रामकृष्ण सुवेदीले लोकान्तरलाई बताए ।

व्यक्तिगत रुपमा लाईसेन्स लिई बर्माले अडिट फर्म खोलेका थिए । उक्त फर्ममा लेखा परीक्षक (अडिटर) हरू सन्तोष श्रीवास्तव, दीपक श्रीवास्तव र राजेश श्रीवास्तव कार्यरत रहेका विभागले जनाएको छ ।

विभागले छापा मारी कागजातहरू बरामद गरेपनि बर्मासहित दुई जना लेखा परीक्षकहरू दीपक श्रीवास्तव र राजेश श्रीवास्तव फरार भएका छन् । सन्तोष श्रीवास्तव र कर्मचारी राजु बैठालाई भने राजस्वको टोलीले पक्राउ गरेको छ ।

बर्माको उक्त फर्मले नेपालका ठूला उद्योग र हाईड्रोपावर कम्पनीहरुलाई नक्कली भ्याट बिल बेच्ने गरेको बताईएको विभागले जनाएको छ । ती तिनै जना लेखापरीक्षकहरूले गाउँका सोझा –साझा गरीब व्यक्तिहरूलाई प्रलोभनमा पारी कम्पनी खोलिदिने गरेको र ती कम्पनीकै भ्याटबिलहरू ठूला उद्योगहरूलाई बेच्ने गरेको विभागले उल्लेख गरेको छ ।

राजस्व अनुसन्धान विभागले नक्कली भ्याट बिल खरिद गर्ने उद्योग र हाईड्रोपावर कम्पनीमाथि पनि अनुसन्धान गरिरहेको जनाएको छ । त्यस्ता उद्योगहरूले सामान खरिद नगरी भ्याटबिल मात्रै खरिद गर्ने गरेकाले अर्बौं राजस्व गुमिरहेको विभाग बताउँछ ।
मंगलवार, जेठ १६, २०७४ मा प्रकाशित

प्रतिक्रिया दिनुहोस

toyota