अञ्चल अस्पतालका डाक्टरले संचालन गरेको नर्सिङ्ग होम अबैध रहेको ठहर

साउन ३, २०७४ जनकपुरधाम ३ साउन -जनकपुर अञ्चल अस्पतालका मेडिकल सुप्रिटेन्डेन्ट डा.रामपरिक्षण यादवले संचालन गरेको निजी अस्पताल कृष्णा नर्सिङ्ग होम अबैध रहेको ठहर भएको छ । जिल्ला जनस्वास्थ्य कार्यालय धनुषा र जिल्ला प्रशासन कार्यालय धनुषाले गरेको छानविनबाट उक्त अस्पताल अबैध रहेको ठहर भएको हो । आवश्यक कारवाहीका लागि प्रक्रिया पनि अगाडी वढेको छ ।

३ बैशाख २०७४ मा लोकान्तर डटकमले जनकपुरमा अबैध अस्पतालको विगविगी भन्ने शिर्षकमा डा.यादवले संचालन गरेको नीजि अस्पताल कृष्णा नर्सिङ्ग होम अबैध रहेको समाचार प्रकाशित भएको थियो । त्यसपछि जनकपुरका स्थानीय संचार माध्यमहरु र केही राष्ट्रिय संचार माध्यमहरुमा पनि उक्त समाचार प्रकाशित भएपछि प्रमुख जिल्ला अधिकारी दिलिप कुमार चापागाईले छानविन अगाडी वढाएका थिए ।

१४ बैशाख २०७४ मा जिल्ला प्रशासन कार्यालय धनुषाका प्रमुख जिल्ला अधिकारी दिलिप कुमार चापागाईले नर्सिङ्ग होम संचालन गर्न पाएको अनुमति पत्र, मापदण्ड प्रक्रिया सम्बन्धि कागजात, कति बेडको नर्सिङ्ग होम संचालन गर्न अनुमति पाएको हो, त्यस नर्सिङ्ग होममा के कुन दर्ताको के कति कर्मचारीहरु कार्यरत छन्, सो को नाम नामेसी सहितको विवरण सम्बन्धि कागजात, घरेलु उद्योगमा दर्ता छ, छैन, जनस्वास्थ्य कार्यालयमा दर्ता छ, छैन, भ्याट तिरेको छ, छैन, तिरेको भए सो सम्बन्धि आवश्यक कागजात, नेपाल सरकारले स्वीकृत गरेको मापदण्ड बमोजिम नर्सिङ्ग होम संचालनार्थ भवन छ, छैन, के कुन साईजको कति कोठाहरु छन्, प्रयोगशाला छ, छैन, भए के कुन साईजको कोठामा संचालन छ लगायतका प्रश्नहरु सहित आवश्यक कागजात र प्रमाण सहित उपलब्ध गराईदिन कृष्णा नर्सिङ्ग होम प्रा.लि.लाई निर्देशन दिएको थियो ।

कृष्णा नर्सिङ्ग होमबाट प्राप्त भएको कागजातहरु नेपाल सरकारले तोकेको अनुसार संचालन भएको छ, छैन भन्ने कुराको छानविन गरी राय सहितको प्रतिवेदन ३ दिन भित्र पठाईदिन जिल्ला प्रशासन कार्यालय धनुषालाई २४ बैशाख २०७४ मा पत्राचार गरेको थियो ।

२९ बैशाख २०७४ मा जिल्ला जनस्वास्थ्य कार्यालय धनुषाका बरिष्ठ जनस्वास्थ्य प्रशासन सच्चिदानन्द देवले छानविन गरी प्रतिवेदन पेश गर्न जनस्वास्थ्य कार्यालयका जनस्वास्थ्य अधिकृत मुन्द्रिका प्रसाद ठाकुर, तथ्याङ्क अधिकृत उमाशंकर यादव र मेडिकल ल्याव टेक्निसियन अधिकृत रोहित यादवलाई निर्देशन दिएका थिए । उक्त टोलीले छानविन गर्दा कृष्णा नर्सिङ्ग होम अबैध रहेको ठहर गरेको हो ।

टोलीको प्रतिवेदन

जिल्ला जनस्वास्थ्य कार्यालय धनुषाका ३ जना अधिकृतहरुको छानविन समितिहरुले कृष्णा नर्सिङ्ग होम प्रा.लि.को अनुगमन गर्दा अनुगमनको क्रममा नर्सिङ्ग होम संचालनको अनुमति पत्र स्वास्थ्य सेवा विभागबाट २० असोज २०५३ को निर्णयानुसार १ बर्षको लागि मात्र अस्थायी सिफारिस दिइएको पाइएको भेटिएको छ ।

स्वास्थ्य संस्था स्थापना संचालन तथा स्तरोन्नती मापदण्ड सम्बन्धि निर्देशिका २०७० अनुसार कुनै पनि संस्थालाई नियमितता दिनलाई प्रत्येक बर्ष नविकरण समयमै गराउनुपर्ने निर्देशिकामा प्रष्ट उल्लेख छ ।
उक्त निर्देशिका अनुसार कुनै कारणबस नविकरणका लागि अवधि भित्रै निवेदन पेश गर्न नसकेको भनि कारण खोलाई थप ६ महिना भित्र निवेदन पेश गरेमा दोब्बर दस्तुर लिई नविकरण गरिदिने व्यवस्था छ । साथै उक्त अबधि भित्र नविकरणका लागि निवेदन पेश नगर्दा स्वतः संचालन अनुमति खारेज हुने निर्देशिकामा प्रष्ट लेखिएको छ ।

अनुगमनको क्रममा कृष्णा नर्सिङ्ग होमको सम्बन्धमा जिल्ला जनस्वास्थ्य कार्यालय धनुषामा कुनै रेकर्ड नपाइएको टोलीका एक सदस्यले बताए । क्लिनिक संचालन सम्बन्धमा स्वास्थ्य संस्था संचालन तथा स्तरोन्नति मापदण्ड सम्बन्धि निर्देशिका अनुसार जिल्ला जनस्वास्थ्य कार्यालय धनुषाबाट संचालन अनुमति लिई मात्र संचालन गर्न पाईने व्यवस्था रहेकोमा विना अनुमति संचालन गरेको पाइएको भन्दै जिल्ला जनस्वास्थ्य कार्यालय धनुषाका छानविन टोलीले २ जेष्ठ २०७४ मा जिल्ला जनस्वास्थ्य कार्यालय धनुषालाई प्रतिवेदन पेश गरेको थियो ।

त्यसपछि सोही व्यहोराको छानविन गरी प्रतिवेदन पेश गरेको भन्दै ३ जेष्ठ २०७४ मा जिल्ला जनस्वास्थ्य कार्यालय धनुषाका कार्यालय प्रमुख तथा बरिष्ठ जनस्वास्थ्य प्रशासक सच्चिदानन्द देवले जिल्ला प्रशासन कार्यालय धनुषालाई प्रतिवेदन बुझाएको थियो ।

१२ जेष्ठ २०७४ मा जिल्ला प्रशासन कार्यालय धनुषाका प्रमुख जिल्ला अधिकारी दिलिप कुमार चापागाईले १२ जेष्ठ २०७४ मा उक्त प्रतिवेदनको व्यहोरा सहित कृष्णा नर्सिङ्ग होम संचालन गर्न वा बन्द गर्न उपयूक्त हुन्छ, राय सहित खोलाई पठाईदिन स्वास्थ्य सेवा विभाग टेकु काठमाण्डौलाई अनुरोध गर्दै पत्राचार गरेका थिए ।
त्यसपछि ३१ जेष्ठ २०७४ मा स्वास्थ्य सेवा विभागले विभागको व्यवस्थापन महाशाखालाई उक्त अबैध कृष्णा नर्सिङ्ग होमलाई आवश्यक कारवाही गरी प्रतिवेदन पेश गर्न निर्देशन गरेको थियो । उक्त निर्देशन सहितको पत्राचारको बोदार्थ जिल्ला प्रशासन कार्यालय धनुषालाई पनि गरिएको थियो ।

स्वास्थ्य सेवा विभागले जनकपुर अञ्चल अस्पतालका कार्यालय प्रमुख समेत रहेका मेडिकल सुप्रिटेन्डेन्ट डा.रामपरिक्षण यादवको स्वामित्वमा संचालित रहेको उक्त अबैध कृष्णा नर्सिङ्ग होमलाई हालसम्म कारवाही गरी बन्द नगराइएकोमा जनकपुरका सरोकारवालाहरु असंतुष्ट देखिएका छन् । स्थानीय प्रशासन र जिल्ला जनस्वास्थ्य कार्यालय धनुषाले समेत छानविन गरी उक्त नर्सिङ्ग होम अवैध रहेको ठहर गरिसकेपनि कारवाही नहुनुले स्थानीय नगरवासीले आशंका गरेका छन् ।

यो पनि पढ्नुस
जँचाउन जाँदै हुनुहुन्छ भने होसियार ! अवैध अस्पतालको विगविगी [लोकान्तर खोज]

साउन ३, २०७४ मा प्रकाशित

प्रतिक्रिया दिनुहोस