बर्माबाट नेपाल आइपुगे रोहिंग्या शरणार्थी, भन्छन्– रातभरी रोएर बस्छौं !

भदौ २६, २०७४

11काठमाडौं २५ भदौ- म्यानमारबाट लखेटिएका अल्पसंख्यक रोहिंग्या समुदायका केही शरणार्थी नेपालमा आइपुगेका छन् । म्यानमार सरकारको सेनाले दमन पूर्वक धपाएपछि उनीहरु शरण खोज्दै १२ दिनअघि नेपाल आइपुगेका हुन् । बर्माबाट लखेटिएका रोहिंग्याहरु बंगलादेशबाट भारत हुँदै नेपाल आइपुगेका हुन् ।

उनीहरु अहिले काठमाडौंको कपनमा आएर बसेका छन् । रोहिंग्या समुदायका झण्डै १ सय ९० जना एक बर्षदेखि कपनमा बस्दै आएका छन् । म्यानमारबाट परिवारसहित लखेटिएपछि आफन्त खोज्दै नेपाल आएका ३२ बर्षका रोहिंग्या आजी जुल्हकले लोकान्तरलाई बताए । ‘नेपाल आएको १३ दिन भयो, ज्यान जोगाउन सकें, तर रातभरी सुत्न सकेको छैन्’ उनले भने । शरणार्थी शिविरमा बसेका रोहिंग्या समुदायका अन्य सदस्यका अनुसार पारिवारिक बिछोडका कारण उनी रातभर रुने गरेका छन् ।

बर्माबाट लखेटिएका उनीहरु केही दिन बंगलादेशमा काम गरेर बाटो खर्च जुटाएर भारतको कोलकत्ता हुँदै नेपाल भित्रिएका हुन् । उनीहरुले आफ्नो मुलुकमा शान्ति भएर बाँच्नसक्ने अवस्था भए भोली नै स्वदेश फर्किने बताएका छन् । बर्माबाट भागेर नेपाल आएकी तमोना बेगनले आफूहरु स्वदेश फर्किन चाहेको बताइन् । ‘घरमा आगो लगाइदिएपछि नदी तरेर बंगलादेशसम्म आइपुग्यौं, त्यहाँबाट नेपाल आइपुग्यौ’ बेगनले भनिन, ‘स्वदेश फर्किने मन छ, शान्ति भए भोली नै बर्मा फर्किने ।’

म्यान्मारमा केहीदिन यता सरकारी सेनाले गरेको दमनको विश्वभर विरोध भइरहेको छ । त्यसको बाछिटा नेपालसम्म आइपुगेको छ ।

ADVERTISEMENT

भदौ २६, २०७४ मा प्रकाशित

प्रतिक्रिया दिनुहोस