खोज/विशेष : टिप्पणी

देउवाले चुनाव सार्ने तयारी गरेकै हुन् कि जनार्दन शर्माले झुटो बोले ?


काठमाडौं ३१ असोज– मुलुकको शान्ति सुरक्षाको जिम्मा पाएका र चुनाव गर्नका लागि महत्वपूर्ण भूमिकामा रहने गृहमन्त्रीको अभिव्यक्तिले ४० दिन पछि हुन गइरहेको प्रदेश र प्रतिनिधि सभा चुनाववारे संशय पैदा गरेको छ । मंगलवार दिउसो मन्त्रालयमा आयोजित पत्रकार सम्मेलनमा गृहन्त्री जनार्दन शर्माले प्रधानमन्त्री देउवाले चुनाव सार्न लागेको सूचना चुहाएका हुन् ।

सरकारका बहालवाला गृहमन्त्रीले नै प्रधानमन्त्रीले चुनाव सार्ने तयारी गर्दैछन् भनेपछि आम सर्वसाधारणमा आशंका पैदा हुनु अस्वभाविक भएन । मन्त्री शर्माको अभिव्यक्तिले पाँच दिनपछि हुन लागेको प्रदेश र प्रतिनिधि सभा चुनावको उम्मेदवारी मनोनयन के हुन्छ भन्ने आशंका बढेको छ ।

जिम्मेवार व्यक्तिको गैरजिम्मेवार अभिव्यक्ति

प्रधानमन्त्रीले चुनाव सार्ने तयारी गरेका छन् भन्ने गृहमन्त्री शर्माको अभिव्यक्तिले सरकार र कांग्रेसभित्र भुइँचालो आएको छ । कृषिमन्त्री एवं कांग्रेस नेता रामकृष्ण यादव गृहमन्त्रीको अभिव्यक्ति पूर्णतया मिथ्या भएको बताउँछन् ।

‘निर्वाचन आयोग लगायत संवैधानिक निकायहरु चुनावको तयारीमा लागेको बेला चुनावको शान्ति सुरक्षाको नेतृत्व गर्नुपर्ने व्यक्तिबाट यस्तो गैर–जिम्मेवार अभिव्यक्ती आउनु दुखद कुरा हो’ मन्त्री यादवले लोकान्तरसंग भने, ‘चुनाव सार्ने भन्ने कुरा मिथ्या हो । सरकार तोकिएको समयमै चुनाव गराउन प्रतिबद्ध छ ।’

गृहमन्त्रीले हचुवा कुरा गर्न मिल्छ ?

प्रधानमन्त्री देउवा साच्चिकै चुनाव सार्ने तयारी गरेका हुन भने उनले जनतालाई आश्वस्त पार्नुपर्छ, होइन भने यस्तो निराधार आरोप लगाउने मन्त्रीलाई बिभागिय कारबाही गर्नु पर्छ । चुनाव सार्ने षडयन्त्र भइरहेको कुरा बाहिर ल्याएका हुन भने गृहमन्त्रीको प्रशंशा गर्नुपर्छ । होइन सरकारमा बसिराख्ने बाहानाका लागि त्यस्तो गैरजिम्मेवार कुरा गरेका हुन भने उनले जवाफ दिनुपर्छ ।

सत्तारुढ दलका नेताहरु माओवादीले सरकारमा बसिराख्न गृहमन्त्रीले बाहानाबाजी गरेको आरोप लगाउछन् । तर गृहमन्त्री शर्माले भने निर्वाचन सुनिश्चितता भए आफूहरु एक मिनेट पनि सरकारमा नबस्ने बताएका छन । 'हामीलाई मन्त्री खान लोभ छैन, तर निर्वाचन सुनिश्चितता हुनुपर्छ ।' मन्त्री शर्माले पत्रकार सम्मेलनमा भने ।

सरकारमा बसिराख्ने बाहाना : लेखक

कांग्रेस नेता रमेश लेखक प्रधानमन्त्रीले चुनाव सार्ने तयारी गर्दैछन भन्ने गृहमन्त्री शर्माको अभिव्यक्ती सत्तामा टिकीराख्ने माओवादीको बाहाना भएको बताउछन् ।
‘माओवादीलाई सरकारमा बसिराख्ने बाहाना चाहिएको छ, त्यसैले गृहमन्त्रीले झुटो बोले’ लेखकले लोकान्तरसंग भने, ‘प्रधानमन्त्रीज्यू तोकिएको मितिमै चुनाव गराउन प्रतिबद्ध हुनुहुन्छ, चुनाव सार्ने कुरा सोच्न पनि सकिदैन ।’

*अद्याबधिक गरिएको
प्रधानमन्त्री देउवाले मन्त्री शर्माको जिम्मेवारी खोसेर विनाविभागिय बनाएका छन् । असोज ३१, २०७४ मा प्रकाशित

प्रतिक्रिया दिनुहोस