सिनेमा

शशि कपूरको दाहसंस्कार हुँदै

काठमाडौं, १९ मंसिर — बलिउड लेजेन्ड शशि कपूरको मंगलवार दाहसंस्कार हुने भएको छ । उनको निधन सोमवार भएको थियो । 

उनानसी वर्षका शशिले कोकिलाबेन अस्पतालमा अन्तिम सास लिए । उनी लामो समयदेखि बिरामी थिए । शनिवार उनलाई छातीमा पीडा भएको थियो । 

बलिउडका कलाकारहरू उनको घरमा श्रद्धाञ्जलि दिन पुगेका थिए । 

उनले सोमवार साँझ ५ बजेर ३५ मिनेटमा अन्तिम सास लिएको अस्पतालले बतायो । 

शशि पृथ्वीराज कपूरका कान्छा छोरा थिए । पृथ्वीराजका तीन छोरा राज कपूर, शम्मी कपूर र शशि कपूर थिए । 

शशि कपूरकी पत्नी जेनिफरको निधन सन् १९८४ मा क्यान्सरको कारण भएको थियो । जेनिफरको निधनपछि उनले एक्लो अनुभव गरेका थिए । 

उनका तीन सन्तान छन् ः कुणाल कपूर, करन कपूर र सञ्जना कपूर । 

शशि कपूरले पृथ्वी थिएटरको नाटक शकुन्ताबाट अभिनय करीयर शुरु गरेका थिए । उनको पहिलो फिल्म आग थियो जसलाई राज कपूरले बनाएका थिए । 

आवारा फिल्ममा शशिले आफ्ना जेठा दाइ राज बाल्यकालीन रोल खेलेका थिए । 

नायकका रूपमा उनको पहिलो फिल्म धर्मपुत्र थियो । उनले १६० भन्दा बढी फिल्ममा अभिनय गरे । 

सन् १९७४ देखि १९९१ सम्म अमिताभ बच्चनका साथ उनले १२ वटा फिल्म खेले । उनीहरूको जोडी सुपरहिट रह्यो । 

दीवार फिल्ममा शशिले बोलेको ‘मेरे पास माँ है’ डाइलग खुबै चर्चित भएको थियो । 

एजेन्सी
 

मंसिर १९, २०७४ मा प्रकाशित

प्रतिक्रिया दिनुहोस