काठमाडौं, २२ कात्तिक — उत्तर कोरियाले आफ्ना जनतालाई बाँकी संसारबाट अलग्याउन जति नै कोशिश गरेको भएपनि हरेक वर्ष त्यहाँबाट एक हजार मानिस भाग्न सफल हुने गरेका छन् । धेरै मानिस पहाड वा नदीबाट भागेर चीन पुग्छन् । 

भाग्नेमा ७० प्रतिशत महिला छन् । तीमध्ये एक हुन् ह्युन सुक ।

सुक सन् २०१३ मा उत्तर कोरियाबाट भाग्न सफल भइन् । उनले उत्तर कोरियाको वास्तविकता बताउनका लागि त्यहाँबाट भागेको बताइन् । 

सुकले उत्तरबाट भाग्नका लागि नदीको बाटो छानिन् । 

सुक भन्छिन्, ‘त्यो नदी धेरै फराकिलो छैन तर त्यसको धार अति नै बढी छ । मैले एकचोटि नदीबाहिर जान खोज्दा तेज धारले मलाई २० मिटर भित्र धकेल्दियो । नदी गहिरो थियो । पानी मेरो टाउकोमाथि पुग्यो । 

सुकले बताएअनुसार, उनलाई पौडी खेल्न आउँदैनथियो । उनी बग्दैबग्दै चीन पुगिन् । सुक भन्छिन्, ‘म जसोतसो हातगोडा फाल्दै किनारामा पुग्ने कोशिश गर्दैथिएँ । केही सैनिकहरूले मलाई देखे र पक्रिने कोशिश गरे । त्यहाँ कोही छ भन्दै उनीहरू चिच्याए ।’

सुकले बताएअनुसार, सैनिकहरू उनलाई पक्रन चाहन्थे तर नदीको धार तेज भएकाले उनीहरू त्यहाँसम्म पुग्न पाएनन् । 

‘मेरा सबै कपडा नदीको तेज धारका कारण फाटेका थिए । म उज्यालोतिर जानुपर्छ भन्ने मलाई थाहा थियो तर म बाटैमा बेहोश भएँ । पहाडबाट सडकको दूरी धेरै थिएन तर घस्रिँदै त्यहाँ पुग्न मलाई तीन घन्टाभन्दा बढी लाग्यो । मैले केही हेर्न सकिरहेकी थिइनँ ।’

सुकका अनुसार, उनको आँखा खोल्दा उनी एक चिनियाँको घरमा थिइन् ।

बीबीसीबाट