काठमाडौं २४ मंसिर–नेकपा एमाले र माओवादी केन्द्र सम्मिलित बामपन्थी गठबन्धनले चुनावमा स्पष्ट बहुमत ल्याउने निश्चित भएपछि यी दुइ दलले पावर शेयरिङ कसरी गर्लान भन्नेमा धेरैको चासो बढेको छ । 

चुनावी तालमेल हुँदै पार्टी एकीकरण गर्ने लक्ष्य लिएका यी दुइ दलले पावर शेयरिङमा समस्या नहुने बताउँदै आएका छन् । 

निर्वाचनमा ६०/४० को अनुपातमा लडेका एमाले र माओवादीले मुख्य चार पदमा भागवण्डा मिलाउन समस्या नरहेको बताउँदै आएका छन् । नेकपा एमालेले राष्ट्रपति र प्रधानमन्त्री तथा माओवादीले उपराष्ट्रपति र प्रधानमन्त्री पाउनेगरी पावर शेयरिङको गृहकार्य भइरहेको ती दलका नेताहरुको दाबी छ ।  

बामपन्थीको बहुमत भएकोले राष्ट्रपति र उपराष्ट्रपतिमा अहिलैकैले निरन्तरता पाउने सम्भावना छ । गणतन्त्र नेपालका पहिलो राष्ट्रपति डा रामबरण यादवले ७ बर्ष राष्ट्रपति बन्ने अबसर पाएको तर महिला राष्ट्रपतिको कार्यकाल छोटो भएकोले विद्या भण्डारी राष्ट्रपतिका रुपमा दोहोरिने सम्भावना रहेको एमाले निकट स्रोतहरु  बताउँछन् । 

प्रधानमन्त्रीका लागि एमाले अध्यक्ष केपी ओली नै सर्वसम्मत हुने सम्भावना छ । ओली प्रधामनन्त्री भएमा पार्टीको काम पुष्पकमल दाहाल प्रचण्डले सम्हाल्ने देखिन्छ ।  

माओवादीले उपराष्ट्रपति पाएमा नन्दबहादुर पुन नै दोहोरिने सम्भावना रहेको बताइन्छ । यद्यपि वामपन्थी गठबन्धनको शुरुमा विरोध गरेका गोपाल किराँतीलाई पनि सो पदको लोभ देखाइ सकिएको जानकारहरु दाबी गर्छन् ।  

सभामुख पद माओवादीले पाएमा पम्फा भुसाल या देव गुरुङ मध्ये एकले सो पद सम्हाल्ने सम्भावना रहेको वताइन्छ । 

वामपन्थी गठबन्धनले मधेस समस्या समाधान गर्नेगरी उपेन्द्र यादव नेतृत्वको संघीय समाजवादी फोरमलाई समेत सरकारमा सहभागि गराउने सम्भावना रहेको छ । 

अहिलेसम्मको मतपरिणामले प्रतिपक्षमा पुग्ने देखिएको नेपाली कांग्रेसले भने एउटा पद पाउने छ । विपक्षी दललाई संसदको सार्वजनिक लेखा समितिको सभापति पद दिने संसदीय मूल्य मान्यताका कारण कांग्रेसले सो पद पाउने सम्भावना छ ।