धनगढी, २५ मंसिर– कैलाली क्षेत्र नम्बर ५ बाट नेपाली कांग्रेसकी उम्मेदवार प्रधानमन्त्री शेरबहादुर देउवा पत्नी आरजु राणा देउवाले पार्टीभित्रकै अन्तर्घातका कारण हार ब्यहोर्नु परेको बताएकी छन् ।

वाम गठवन्धनका उम्मेदवार नारदमुनी रानासँग पारजित भएपछि प्रतिक्रिया दिँदै आरजुले हारेपनि कैलाली क्षेत्र नम्बर ५ को  विकासमा लागिपर्ने समेत बताइन् । ‘चुनाव भनेको प्रक्रिया हो । हारजित भइरहन्छ,’ आरजुले भनिन्, ‘हारेपनि विकासमा लागिरहन्छु  । जसरी संविधान बनेको स्पीड छ सरकार पनि त्यही स्पिटमा चलोस् ।’

आरजुले आफूलाई मतदान गर्ने सबैलाई धन्यवाद समेत व्यक्त गरिन् । तर पार्टीभित्रकै अन्तर्घातका कारण आफूले हार ब्यहोर्नुपरेको उनले बताइन् । ‘केन्द्रमा एलाइन्स भयो ।  त्यसको म्यासेज तलसम्म पुगेन,’ उनले भनिन्, ‘कांग्रेसको पूरानै रोग अन्तर्घात पनि हो ।’

चुनाव प्रचारका क्रममा भोट माग्न जनताको घर घरसम्म पुग्न नसक्दा पनि आफूले कम मत पाएको आरजुको ठम्याइ छ । धनगढीमा जातिय समस्या रहेको भन्दै आरजुले आफ्नो हारको कारण त्यो पनि रहेको बताइन् । 

आफूलाई हराएर विजयी भएका वाम गठवन्धनका उम्मेदवार नारादमुनीलाई बधाई दिँदै आरजुले राम्रो काम गर्न सुझाव दिइन् ।