सुनसरी, २५ मंसिर —सोमबार बिहान ११ बजेदेखि अबरुद्ध सुनसरी क्षेत्र नम्बर ३ को मतगणना अझैं सुरु हुन सकेको छैन । सुनसरी ३ मा वाम गठबन्धनकी एमाले उम्मेदवार भगवती चौधरी र  कांग्रेस उम्मेदवार विजयकुमार गच्छदारबीच प्रतिस्पर्धा छ । 
मतगणनाको क्रममा बदर मतका  विषयमा  विवाद उत्पन्न भएपछि मतगणना पूर्ण रुपमा स्थगित भएको हो । 
मतगणनाको क्रममा मतपेटिकाको शिल शंकास्पद अवस्थामा भेटिएको भगवतीको दाबी छ । सोपछि उनका कार्यकर्ताले मतदान अधिकृतले नै गच्छदारलाई जिताउन धाँधलीको प्रयास गरेको आरोप लगाएका छन् भने यसकै विरोधमा आज दिनभर नाराबाजीसमेत गरेका थिए ।  
अहिले विवाद मिलाउन छलफल चलिरहेको भएपनि कुनै सहमति बन्न नसकेको बताइएको छ । 
पछिल्लो मतगणनाको सार्वजनिक नतिजानुसार चौधरीले २९ हजार ३२६ र गच्छदारले भगवतीभन्दा १५५ मत कम अर्थात् २९ हाजार १७१ मत प्राप्त गरेका छन्  । 

यो नतिजा प्राप्त हुनुअघि सार्वजनिक गरिएको मतपरिणामअनुसार गच्छदारले झिनो मतान्तरले अग्रता लिएपनि चौधरीले पुन अग्रता लिएसँगै मतगणनाको मतपेटिका संकास्पद अवस्थामा भेटिएको भन्दै चौधरीले विरोध गरेपछि मतगणना रोकिएको हो । 
 चौधरीले  धाँधली हुनसक्ने भन्दै सुरुदेखि नै कडा रुपमा प्रस्तुत हुँदै आएकी छिन् । 
स्मरण रहोस्  ०७० सालको संविधानसभा निर्वाचनमा चौधरीलाई नै झिनो मनान्तरले हराउँदै गच्छदार विजयी भएका थिए ।