काठमाडौं, २७ मंसिर — एम्प मिडिया एन्ड एड्भर्टाइजिङ प्राइभेट लिमिटेड र सिग्नेचर इभेन्टोस, भारतले भारतको देहरादूनमा हिमोत्सव गर्ने भएका छन् । 

यो उत्सव मंसिर २९ देखि पुस २ गते अर्थात् डिसेम्बर महिनाको १५ देखि १७ तारिखसम्म आयोजना गरिनेछ । देहरादूनको परेड ग्राउन्डमा कार्यक्रम हुन लागेको हो ।

हिमोत्सवमा नेपाल र भारतका सांस्कृतिक नृत्य, वाद्यवादन, लोकगीत, लोकनृत्यका प्रस्तुति रहनेछन् । नेपालबाट ७५ जिल्लामा प्रचलनमा रहेका लोकभाकाका गीत र नृत्यलाई नेपालबाट गएका २५ जना कलाकारहरूले प्राचीन वाद्यसामग्रीका साथ प्रस्तुत गर्नेछन् । 

भारतीय भूमिमा गएर भारतीयहरूसँग एउटै मञ्चबाट यसरी आआफ्ना देशका संस्कृति झल्किने कार्य गर्न पाउनु दुवै देशका प्रस्तोता र दर्शकका लागि सुनौलो अवसर भएको आयोजकहरूले बताएका छन् । 

दुवै देशका सांस्कृतिक कलाकारहरूले एकआपसमा आआफ्नो संस्कृतिलाई साटासाट गर्न पाउने र साझेदारी बढाउन सक्ने अवस्थाको सिर्जना यस उत्सवले गराउने उनीहरू बताउँछन् । 

यस उत्सवले पर्यटन, कला, संस्कृति, परम्परा, इतिहास र व्यापारको क्षेत्रमा एक देश र अर्को देशका बीच सामञ्जस्य प्रदान गर्नेछ । 

हिमोत्सव आयोजकहरूले नेपाल र भारतमा विभिन्न कार्यक्रम गर्दै आइरहेका छन् । यसै सिलसिलामा हिमोत्सवको प्रचारका लागि ललितपुरको पुल्चोकस्थित लबिम मलमा ‘लक्ष्य ब्यान्ड’ले  बुधवार भव्य प्रस्तुति दिएको थियो । 

हिमोत्सव कार्यक्रमको सफलताका लागि नेपाल पर्यटन बोर्ड, नेपाल भारत मैत्री संघ, लबिम मल, स्मार्ट डोको, वेलकमनेपाल डट्कम लगायतले सहयोग गरेका छन् । 

भारत गएर प्रस्तुति दिन लागेका नेपालीहरूमा लक्ष्य ब्यान्ड, गायक योगेश काजी, गायिका आकांक्षा बस्याल, गायक मुस्कान रानाभाट, नर्तक तरेली सांस्कृतिक समूह र गायक ओस्कर तमु परेका छन् ।