इम्वोस्ड नम्वर प्लेट जडान प्रक्रिया सुरु, प्रदेश नम्बर ३ मा दर्ता भएका सबै गाडीले असारभित्र जडान गर्नुपर्ने

काठमाडौं, २८ मंसिर- प्रदेश नम्बर ३ बाग्मतीमा दर्ता भएका सबै गाडीले आगामी असारभित्र रुपमा अनिवार्य इम्वोस्ड नम्वर प्लेट जडान गर्नुपर्ने भएको छ ।  तीनपाङग्रे(ट्याम्पो) तथा चार पाङग्रे सवारीसाधन दुवैका लागि अनिवार्य गरिएको  यातायात व्यवस्था विभागले जनाएको छ । विभागका अनुसार तीन नम्वर प्रदेशमा दर्ता भएका १२ लट सम्मका निजी गाडी  र सरकारी तथा संस्थानका गाडीले चैतभित्र नम्वर प्लेट जडान गरिसक्नुपर्ने छ । त्यस्तै बाँकी सवारीसाधनले असार मसान्तभित्र इम्वोस्ड नम्वरप्लेट जडान गर्न समयसीमा दिएको उनले बताए।

१३ लटभन्दामाथिका सवारीसाधनले आगामी ०७५ असारमसान्तसम्म समयसिमा तोकिएको छ । समयसीमा भन्दा अघि जोड्न पनि पाइनेछ। बाइकका लागि भने असारपछि आवेदन खुल्ने छ । पहिलो चरणमा प्रदेश नम्बर ३ बाट सुरु गरेर आगामी पाँच बर्षमा देशैभरि इम्वोस्ड नम्बर प्लेट कार्यान्वयनमा ल्याउने विभागले तयारीं थालेको हो । विभागका प्रवक्ता डा. टोकराज पाण्डेका अनुसार तीन पाङग्रे सवारीसाधनले २  हजार ९ सय तथा चारपाङग्रे सवारीसाधनले ३ हजार २ सय रुपैयाँ मूल्य तोकिएको छ ।

विभागका अनुसार पहिलो चरणमा तीन पाङग्रे र चार पाङग्रे सवारीसाधनले मात्र इम्वोस्ड नम्वर प्लेट जडान गर्न सक्नेछन् ।  आवेदन दिनु अघि  गाडीका सबै कर क्लियर गर्नुपर्छ । तोकिएको शुल्क बुझाएर रसिद लिनुपर्छ । शुल्क बुझाएको रसिदसहित आफ्नो गाडीको विवरण यातायात व्वयस्था विभागको वेबसाईटमा  गएर  अनलाइन फाराम भर्न सकिन्छ । आवेदन भरेको १० दिनमा इम्वोस्ड नम्वर प्लेट तयार हुने विभागले जनाएको छ ।
 

मंसिर २८, २०७४ मा प्रकाशित

प्रतिक्रिया दिनुहोस