काठमाडौं, २८ मंसिर– यसपटकको चुनावमा प्रत्यक्षतर्फ एक सीट र समानुपातिकतर्फ ३ प्रतिशतको थ्रेसहोल्ड पूरा गरेर राष्ट्रिय पार्टी बन्ने विवेकशील साझाको लक्ष्यमा बिराम लागिसकेको छ । किनकी विवेकशील साझाले प्रत्यक्षतर्फ एउटा पनि सीट जित्न सकेन् । साथै प्रतिनिधिसभाको समानुपातिकतर्फ ३ प्रतिशत थ्रेसहोल्ड कटाउन पनि उसका लागि लगभग असम्भव जस्तै छ । प्रतिनिधिसभाको समानुपातिकतर्फ ८० प्रतिशत मतगणना भइसक्दा विवेकशील साझाले २ प्रतिशत मात्रै मत पाउन सकेको छ । 

प्रतिनिधिसभामा प्रतिनिधित्व नहुने लगभग निश्चित भइसकेको अवस्थामा विवेकशील साझाका लागि प्रदेश नम्बर ३ को प्रदेशसभाका लागि ढोका खुला भइसकेको छ । प्रदेशसभामा प्रत्यक्षतर्फ एउटा पनि सीट नजितेको भए पनि विवेकशील साझा समानुपातिकतर्फबाट प्रदेशसभामा प्रतिनिधित्व गर्न पाउने भएको छ । 

निर्वाचन आयोगले सार्वजनिक गरेको ३ नम्बर प्रदेशको समानुपातिकतर्फको मतपरिणाम अनुसार विवेकशील साझाले १ लाख १४ हजार २० अर्थात् ६.७ प्रतिशत मत पाएको छ । ३ प्रतिशतभन्दा बढी मत प्राप्त गर्ने दलले प्रदेश संसदमा प्रतिनिधित्व गर्न पाउनेछन् । 

समानुपातिकतर्फ प्रदेश ३ मा नेकपा एमालेले सबैभन्दा बढी ३६.९ प्रतिशत अर्थात् ६ लाख २० हजार १ सय ४६ मत ल्याएको छ भने निकट रहेको कांग्रेसले २९.८ प्रतिशत अर्थात् ५ लाख १४ हजार ४ सय ६८ मत पुर्याएको छ । तेस्रो स्थानमा रहेको माओवादी केन्द्रले १६.६ प्रतिशत अर्थात् २ लाख ८५ हजार ९ सय ९६ मत प्राप्त गरेको छ । 

प्रतिनिधिसभामा थ्रेसहोल्ड कटाउने सम्भावना गुमाइसकेको कमल थापा नेतृत्वको राप्रपाले प्रदेश ३ को प्रदेशसभाका लागि भने थ्रेसहोल्ड कटाएको छ । राप्रपाले ३.३ प्रतिशत अर्थात् ५७ हजार ५ सय २१ मत प्राप्त गरेको छ ।

१३ जिल्ला रहेको प्रदेश तीनमा काठमाडौं र चितवन बाहेक अन्य जिल्लाको समानुपातिकतर्फको पनि मतगणना सकिसकेको छ । निर्वाचन आयोगले बिहीवार अपराह्न सार्वजनिक गरेको विवरणअनुसार प्रदेश तीनमा काठमाडौं र चितवनको मतगणना भइरहेको छ ।   

हेर्नुहोस् प्रदेश ३ मा समानुपातिकतर्फ कुन दलले कति प्रतिशत मत ल्याए ?