काठमाडौं, २९ मंसिर — म्यानमार (बर्मा) का सैनिक अधिकारीहरूले रोहिन्ज्या अल्पसंख्यकका विषयमा सञ्चारमाध्यमहरूमा चर्चा नहोस् भनेर बेलायतको उपनिवेश रहेका बखत बनेको गोप्यता सम्बन्धी ऐनलाई कृयाशील गराएको खबर फ्रान्सिसी संवाद समिति ए.एफ्‌.पी. ले दिएको छ ।

सैनिक कारवाही विषयक गोप्य सूचना अनधिकृत ढङ्गले प्रहरीबाट लिएर विदेशी समाचार माध्यमलाई दिएको आरोपमा रोयटर्स संस्थाको लागि काम गर्ने दुइजना बर्मेली पत्रकारलाई मङ्गलवार पक्राउ गरिएको छ । दोषी प्रमाणित भएमा ३१ वर्षीय वा लोन र २७ वर्षीय क्वा सोई ऊ १४/१४ वर्षको कैद सजायमा पर्नेछन् ।

यसैबीच, रोयटर्सका अध्यक्ष स्टिफन जे. एड्लरले एक वक्तव्य जारी गर्दै प्रेस स्वतन्त्रतामा आघात पर्ने यस कामको निन्दा गर्दै गिरफ्तार गरिएका पत्रकारलाई तुरुन्तै रिहा गर्ने माग गरेका छन् ।

रखाइन प्रदेशमा बस्ने रोहिन्ज्या अल्पसंख्यकमाथि विगत तीन महिनामा भएका अत्याचारको सूचना पत्रकारलाई दिएको अभियोगमा दुई प्रहरी अधिकृत पनि समातिएका छन् ।

रोहिन्ज्याहरूलाई उठिबास गराउने बर्माको सरकारी नीतिलाई  राष्ट्रसंघले ‘जातीय सफाया’ ठह-याउँदै आएको छ ।