काठमाडौं, २९ मंसिर — फेसबूकमा अमेरिकाका पूर्वराष्ट्रपति बाराक ओबामा र उनकी पत्नी मिसेल ओबामालाई बाँदरसँग तुलना गरेर स्टेटस लेख्ने रिपब्लिकन सांसदले बुधवार आत्महत्या गरेका छन् ।

केन्टकी राज्यका रिपब्लिकन सांसद ड्यान जोन्सोनले आत्महत्या गरेका हुन् । उनीमाथि एक किशोरीको यौन शोषण गरेको आरोप पनि लागेको थियो । यस घटनाको अनुसन्धान चलिरहेको थियो । 

केन्टकीको फ्य्रांकफर्टबाट दक्षिणपश्चिम दिशामा ५५ माइल पर एक पुलमा बन्दुकसहित जोन्सनको शव बरामद गरिएको बताइएको छ । 

सन् २०१३ मा आफ्नै घरमा छोरीकी १७ वर्षीया साथीलाई जोन्सनले बलात्कार गरेको आरोप लागेको थियो । घटना सार्वजनिक भएपनि जोन्सनको राजीनामा मागिएको भएपनि उनले अस्वीकार गरेका थिए । उनले यो आरोप झुटो भएको
र राजनीतिक उद्देश्यले प्रेरित भएको बताएका थिए । 

बुलिट काउन्टीका शेरिफ ड्यानी टिन्नेलले ५७ वर्षीय जोन्सनले माउन्ट वाशिङटन, केन्टकीको एक पुलमा आत्महत्या गरेको बताए । 

उनी सन् २०१६ मा निर्वाचित भएका थिए । 

फेसबूकमा जाति विभेदपूर्ण टिप्पणी गरेपछि उनलाई रिपब्लिक नेताहरूले चुनावी दौडबाट बाहिरिन अनुरोध गरेका थिए । तर उनले त्यसलाई लत्याउँदै चुनाव लडे र जिते पनि । 

एजेन्सी