अन्तिम टी२० मा न्युजील्यान्डले वेस्ट इन्डिजलाई लज्जास्पद हार दिलायो, कोलिन मुनरोले बनाए शतक

पुस १९, २०७४

काठमाडौं, १९ पुस — न्युजील्यान्डको भ्रमण गरिरहेको वेस्ट इन्डिजले तेस्रो तथा अन्तिम टी२० क्रिकेट म्याचमा ११९ रनको लज्जास्पद पराजय बेहोरेको छ । यससँगै न्युजील्यान्ड तीन टी२० शृंखलामा २–० ले विजयी भएको छ ।

न्युजील्यान्डका ओपनर कोलिन मुनरोले ५३ बलमा १०४ रन बनाएर टोलीलाई निर्धारित २० ओभरमा पाँच विकेटको क्षतिमा २४३ रनको विशाल स्कोर बनाउन योगदान गरे । मुनरोले १० छक्का हाने । टी२० मा तीन शतक बनाउने उनी पहिलो ब्याट्स्म्यान बनेका छन् । 

माउन्ट माउनगानुईमा बुधवार भएको खेलमा न्युजील्यान्डले टी२० मा आफ्नो सर्वाधिक ठूलो स्कोर खडा गरेको हो । टी२० क्रिकेटमा यो सातौं सर्वाधिक ठूलो स्कोर हो ।

अर्का ओपनर मार्टिन गुप्तिलले ६३ रन बनाए अनि मुनरोसँग मिलेर १३६ रनको साझेदारी गरे । 

वेस्ट इन्डिजले जवाफमा जम्मा १२४ रन बनाएर अल आउट भयो । विस्फोटक ब्याट्स्म्यान क्रिस गेल दोस्रो बलमा डकआउट भए । आन्द्रे फ्लेचर मात्रैले अलिक सुदृढ ब्याटिङ गर्दै ४६ रन बनाए । 

वेस्ट इन्डिजले वर्ल्ड टी२० च्याम्पियनको जस्तो खेल देखाउनै सकेन । 

न्युजील्यान्डले टी२० क्रिकेटमा सर्वाधिक ठूलो रनअन्तरको विजय प्राप्त गरेर इन्टरनेसनल क्रिकेट काउन्सिलको वरीयतामा पहिलो स्थान कायम गरेको छ । 

एजेन्सी

पुस १९, २०७४ मा प्रकाशित

प्रतिक्रिया दिनुहोस