काठमाडौं, २३ पुस– मलेसियन वायुसेवा कम्पनी एयर एसिया एक्सको नेपालका लागि आधिकारिक टिकेटिङ कम्पनी इन्सेन्टिभ ग्रुपले  पाएको अल्टिमेटमभित्र पनि बक्यौता रकम तिर्न सकेको छैन ।

ग्रुपले  विभिन्न शुल्क बापत त्रिभुवन विमानस्थललाई २३ करोड रकम बुझाउन बाँकी छ । तर,  अन्तिम समयमा आएर ग्रुपले आइतबार अपरान्ह २ करोडको खाली चेक नेपाल नागरिक उड्यन प्राधिकरणलाई बुझाएको खुलेको छ । 
 आइतबार ग्रुपका अध्यक्ष हरिभान लामाले २ करोडको खाली चेक दिएर सोमबार मात्रै  रकम खातामा जम्मा गर्ने बचन दिएका हुन् । 

प्राधिकरणका प्रवक्ता वीरेन्द्र प्रसाद श्रेष्ठले   लामाले आइतबार दिउँसो २ करोडको चेक दिए पनि खातामा रकम जम्मा गर्ने मिति भने सोमबारको दिएको लोकान्तरलाई बताए । 

श्रेष्ठले भने, ‘हामीले दिएको अन्तिम मिति आइतबार जम्मा २ करोड रुपैयाँको चेक मात्रै आएको छ, त्यसको ब्यालेन्स पनि  सोमबार जम्मा गर्ने भनेका छन्, यदी सोमबार रकम जम्मा नभए मंगलबार देखि उडान रोकिनेछ ।’ 
लामाले बाँकी २१ करोड रकम छिट्टै तिर्ने बताएको विमानस्थल कार्यालयले जनाएको छ । 

एयर एशिया एक्सको नेपाली एजेन्ट कम्पनी इन्सेन्टिभ ग्रुपले पटक–पटक ताकेता गर्दा समेत बिगत ३ वर्षदेखि विमानस्थललाई तिर्नुपर्ने २३ करोड र पर्यटक सेवा शुल्क बापत नेपाल पर्यटन बोर्डलाई तिर्नुपर्ने ७ करोड २३ लाख रकम तिर्न अटेर गर्दै आएको   थियो । 

विमानस्थल कार्यालयकाअनुसार एयरलाइन्सले विमानस्थललालाई तिर्नुपर्ने बिसान शुल्क (ल्याण्डिङ चार्ज), सञ्चार तथा उड्डयन सहायक सेवा (एयर नेभिगेसन), विमानस्थल विकास शुल्क, कोठा भाडा लगायतको शुल्क तिर्न बाँकी रहेको हो  । यस्तै  इन्सेन्टिभ ग्रुप  अन्तर्गतकै ट्राभल एजेन्सीले पर्यटन सेवा शुल्क बापत पर्यटकबाट उठाएको रकमसमेत तिर्न बाँकी छ । 

प्राधिकरणले आज आइतबार विमानस्थललाई तिर्नुपर्ने पुरा २३ करोड नतिरे सोमबारबाटै उडान रोक्ने अन्तिम अल्मिेटम दिएको थियो । तर,  ग्रुपले आइतबार अन्तिम समयमा आएर २ करोडको चेक त्यो पनि सोमबारको मिति  भएको काटेर छोडिदिएको हो । 

एयरलाइन्सले पर्यटन बोर्डलाई तिर्नुपर्ने  ७ करोड २३ लाख रुपैयाँ पनि आइतबार  तिरेको छैन ।

विमानस्थल कार्यालयले सोमबार २ करोडको चेक बाउन्स भए (खातामा पैसा जम्मा नगरेर फिर्ता भए) मंगलबारदेखि सेवा बन्द गर्ने चेतावनी दिएको छ । 

सन् २०१४ सम्ममा लगातार उत्कृष्ट एयरलाइन्स बन्न सफल भएको मलेसियाको एयर एसियाले नेपालमा तिर्नुपर्ने सामान्य शुःल्क समेत नतिरेको हो । 

यसैबीच लोकान्तरले पटकपटक सम्पर्क गर्दा पनि एयरलाइन्सका नेपाली एजेन्ट लामा सम्पर्कमा आउन चाहेनन् ।