काठमाडौं, ३ माघ — आफ्नो प्रभावशाली अभिनय र फरक भूमिकाका लागि प्रसिद्ध विद्या बालनले हालै तुम्हारी सुलु नामक फिल्मबाट प्रशंसा पाएकी थिइन् । यस फिल्ममा विद्याले रेडियो जकी बन्ने एक मध्यमवर्गीय परिवारको महिलाको भूमिका निर्वाह गरेकी छन् । 

आफूले खेलेका फिल्महरूका बारेमा विद्या भन्छिन्, ‘तुम्हारी सुलु र डर्टी पिक्चर दुवै महिलाप्रधान फिल्म हुन् तर यिनमा मेरो भूमिका फरक फरक थिए । डर्टी पिक्चरमा सिल्क स्मिताले आफ्नो शरीरलाई मुद्राको जस्तो गरी प्रयोग गरेकी थिइन् भने सुलु साहस र आत्मविश्वासको प्रयोग गर्छिन् ।’

उनले थपिन्, ‘सुलुले महिलाहरू लेट नाइट जब गर्न सक्दैनन् भन्ने सोचलाई तोडेकी छन् । अनि सेक्सी हुनका लागि छोटा स्कर्ट र लामो गोडा हुनुपर्छ भन्ने छैन । यो फिल्म गर्नुअघि म मध्यमवर्गीय एक विवाहिता महिलाले अपरिचित मानिसहरूसँग निजी कुरा गर्न सक्छिन् भनेर पत्याउँदिनथें ।’

सेक्सीको आफ्नै परिभाषा दिँदै विद्या भन्छिन्, ‘मेरो लागि सेक्सी हुनु भनेको सेक्सी देखिनु हैन, सेक्सी हुनु हो । भाँडाकुँडा माझ्दै गर्दा सुलु आफ्नो पतिलाई भन्छिन् – हामीले सेक्स गरेको धेरै दिन भयो । मेरो नजरमा सेक्सी हुनु भनेको यही हो । मानिसहरू तपाईंको लूक्समाथि टिप्पणी गरेर सेक्सी भनिदिन्छन् तर तपाईं लूक्सले नभई सोचले सेक्सी हुनुहुन्छ ।’

एजेन्सी