काठमाडौं, ४ माघ-सरकारले प्रदेशको अस्थायी राजाधानी तोकेपछि देशका विभिन्न भू-भागमा आन्दोलन चर्किएको छ । विशेषगरी प्रदेश नम्बर १ को धनकुटा, २ को वीरगञ्ज, ५ को दाङ तथा ७ को दीपायलका बासिन्दा आन्दोलित बनेका छन् ।

आन्दोलन बिहीबार दिनभर जारी रह्यो ।

हेर्नुहोस्, दिनभरी कहाँ के भयो ?

धनकुटामा कर्फ्यू, सरकारी कार्यालयमा तोडफोड र आगजनी

सरकारले प्रदेश नम्बर १ को अस्थायी राजधानी विराटनगर तेकोको विरोधमा आन्दोलित धनकुटाको स्थिति तनावग्रस्त बनेपछि अनिश्चितकालीन कर्फ्यू आदेश जारीगरिएको छ । प्रदर्शनकारी तोडफोड र आगजनीमा उत्रिएपछि बिहान साढे ११ बजेबाट अर्को आदेश जारी नभएसम्मका लागि निषेधाज्ञा जारी गरिएको जिल्ला प्रहरी कार्यालय धनकुटाका प्रहरी प्रमुख एसपी सुदीप राजभण्डारीले जानकारी दिए ।

प्रदशर्नकारीले क्षेत्रीय प्रशासन कार्यालयमा आगजनी, विभिन्न सरकारी कार्यालय र एम्बुलेन्समा समेत तोडफोड भएपछि कर्फ्यू लगाउनुपरेको उनको भनाइ छ । स्थितिलाई नियन्त्रणमा लिन प्रहरीले २ राउण्ड अश्रुग्याससमेत प्रहार गरेको थियो ।

डोटीमा 'उग्र प्रदर्शन', प्रधानमन्त्रीको 'शवयात्रा'

सरकारले धनगढीलाई प्रदेश ७ को राजधानी तोकेपछि आन्दोलित बनेका डोटीवासीले बिहीबार दीपायलमाप्रधानमन्त्री शेरबहादुर देउवाको 'शवयात्रा'सहित उग्र प्रदर्शन गरेका छन्। बिहानैदेखि दीपायल र सिलगढी ठप्प पारेका आन्दोलनकारीले यातायातका कुनै पनि साधान चल्न दिएन्। आक्रोशित आन्दोलनकारीले दीपायलमा रहेको ट्राफिक प्रहरी चेकपोष्टमा समेत आगो लगाए ।

आन्दोलन अराजक बन्दै गएपछि भीडलाई नियन्त्रण गर्न प्रहरीले चार राउण्ड आश्रु ग्यास प्रहार गर्‍यो । प्रहरी हस्तक्षेपका क्रममा तीन जना घाइते भएका छन् ।

वीरगञ्ज ठप्प, दिनभर प्रदर्शन

वीरगञ्जलाई प्रदेश २ को राजधानी बनाउन माग गर्दै आह्वान गरिएको बन्दका कारण दिनभर पर्साको जनजीवन प्रभावित भयो । बिहानैदेखि वीरगञ्जको घण्टाघर, आदर्शनगर, छपकैया, मुर्ली, पावरहाउस, गण्डक, नगवार, इनर्वालगायतका चोकमा टायर बालेर प्रदर्शन भएको हो । बन्दको अवज्ञा गरेको भन्दै वीरगञ्जको घण्टाघर चोकमा आन्दोलनकारीले करिब आधादर्जन सवारी साधन तोडफोड गरे । आन्दोलनकारीले दुईवटा चारपाङ्ग्रे र चारवटा तीन पाङ्ग्रे इ–रिक्सामा तोडफोड गरेको प्रहरीले जनाएको छ । एम्बुलेन्स, वारुणन्त्र, पर्यटक सवार वाहन, सञ्चार माध्यमका सवारी साधन, मोटरसाइक, सइकल बाहेकका सबै सवारी साधन सञ्चालनमा आन्दोलनकारीले रोक लगाए ।

गृहजिल्लामै देउवाको पुत्लादहन

प्रदेश राजधानी धनगढी तोकिएको विरोधमा गृहजिल्ला डडेल्धुरामै प्रधानमन्त्री शेरबहादुर देउवाको पुत्ला दहन गरियो । डडेल्धुरालाई नै प्रदेश राजधानी बनाउन माग गर्दै आन्दोलनमा उत्रिएका प्रदर्शनकारीले जिल्ला सदरमुकामस्थित बसपार्कमा भेला भएर प्रधानमन्त्री देउवाको पुत्लादहन गरेका हुन् ।

दाङमा पनि प्रदर्शन

प्रदेश नम्बर ५ को राजधानी बुटवल बनाएको विरोधमा दाङमा पनि विरोध प्रदर्शन भयो । नेपाली कांग्रेसको भातृ संगठन नेविसंघले पार्टी सभापतिसमेत रहेका प्रधानमन्त्री शेरबहादुर देउवाको पुत्ला दहन गर्‍यो । प्रदेश राजधानी दाङमा बनाउनु पर्ने उनीहरुको माग छ ।