काठमाडौं, ५ माघ- पूर्व डीआईजी एवम् ललितपुर क्षेत्र नम्बर १ बाट निर्वाचित सांसद नवराज सिलवालले आफूविरुद्ध प्रतिशोध साँधिएको भन्दै त्यसको डटेर सामना गर्ने बताएका छन् । कार्य सम्पादन मूल्याङ्कन किर्ते गरेको अभियोगमा प्रहरीले खोजी रहेका बेला सरकारतर्फ लक्षित गर्दै सिलवालले यस्तो ट्वीट गरेका हुन् ।

'म जनताको प्रतिनिधि हुँ र कानूनको परिपालक एक जिम्मेवार नागरिक पनि हुँ । समय सकिन लाग्यो भन्ने हतारोमा राजनीतिक प्रतिशोध साँध्न शक्तिको गलत प्रयोग गरी आफ्नो विपक्षीलाई प्रहार गर्ने जुन नौटंकी प्रदर्शन हुँदैछ, सत्यको जगमा त्यसको डटेर सामना हुनेछ,' सिलवालले ट्वीट गरेका छन् ।

सिवाललाई खोज्न प्रहरीले देशभर सर्कुलर जारी गरिसकेको छ । प्रहरीले उनलाई अहिलेसम्म भेट्न सकेको छैन । सिलवाल विदेशमा रहेको प्रहरीको आशंका छ ।

म जनताको प्रतिनिधि हुँ र कानूनको परिपालक एक ज़िम्मेवार नागरिक पनि हुँ । समय सकिन लाग्यो भन्ने हतारोमा राजनीतिक प्रतिशोध साध्न शक्तिको ग़लत प्रयोग गरी आफ्नो विपक्षिलाई प्रहार गर्ने जुन नौटंकि प्रदर्शन हुँदैछ, सत्यको जगमा त्यसको डटेर सामना हुनेछ l

— Nawa Raj Silwal (@Nawasilwal) January 19, 2018