काठमाडौं, ५ माघ– न्यूजिल्याण्डकी प्रधानमन्त्री ज्याकिन्डा आर्डेनले आफू गर्भवती भएको सार्वजनिक गरेकी छिन् । उनले शुक्रबार यस्तो बताएकी हुन् ।

सिएनएनमा प्रकाशित समाचारमा क्लार्कले बच्चा पाउने कुराले आफू खुसी भएको बताएकीछन् । प्रधानमन्त्री जाकिन्डाले आफू र श्रीमान क्लार्के गेफोर्डले यसै जुनमा बच्चा पाउने बताएकी हुन् । “आउँदो जुनमा हामी दुईवटा तीन हुने कुराले क्लार्क र म निकै उत्साहित छौं ।” उनले भनेकी छिन् ।

सञ्चारकर्मीसँग कुरा गर्दै उनले बच्चा पाएपछि ६ हप्ता विदा लिने समेत बताइन् । “धेरै काम एकैपटक गर्नुपर्ने म एक्ली महिला होइन, काम र बच्चा दुबै सम्हाल्नु पर्ने पनि एक्ली होइन, हो, मेरो हकमा केही विशेष परिस्थिति छ, तर म जस्तै भूमिका कुशलतापूर्वक निर्वाह गरेका महिलाहरु यसअघि पनि थिए । मैले पनि त्यही गर्नेछु ।” उनले भनिन् ।

गत अक्टोबरमा आफू गर्भवती भएको थाहा पाएको उनले बताइन । उनले गर्भववी भएको शुरुको तीन महिनामा एकातिर सरकार गठन र चलाउने कुराको चिन्ता भएको र अर्कोतर्फ गर्भावस्ताको शुरुआती लक्षणहरुले समस्या भएको बताइन । 

आर्डेनले बच्चा पाएपछि उप प्रधानमन्त्री विन्स्टन पिटरलाई कार्यवाहक प्रधानमन्त्रीको जिम्मेवारी लिन भनेकी छिन् । प्रधानमन्त्रीको घोषणापछि उनलाई बधाई दिनेको ताँती लागेको छ ।