जनकपुरधाम, ५ माघ- स्वतन्त्र मधेश गठबन्धनका संयोजक सीके राउतले प्रहरीले आफूलाई नजरबन्दमा राखेर टर्चर दिइराखेको बताएका छन् । प्रहरीको घेराभित्र रहेका राउतले लोकान्तरसँग टेलिफोनमा कुराकानी गर्दै रातिदेखि नै प्रहरीले आफूलाई नजरबन्दमा राखेको बताएका हुन् ।

'प्रहरीले रातिदेखि नै नजरबन्दमा राखेको छ, अझै बिहानदेखि त २ वटा भ्यानसमेत ल्याएर घरअगाडि राखिएको छ,' राउतले लोकान्तरसँग भने, 'कि पक्राउ पूर्जी ल्याएर पक्राउ गर्नू, म गिरफ्तारी दिन तयार छु, होइन भने यस्तो टर्चर किन ?'

उनले आफ्नो ६ वर्षीय छोराले परीक्षा दिनसमेत नपाएको गुनासो गरे । 'मेरो ६ वर्षीय छोरा योगेश कक्षा १ मा पढ्छ, उसको परीक्षा छ, आतङ्कित भएर परीक्षा दिनसक्ने अवस्थासमेत छैन, परिवारका सबै सदस्य आतङ्कित छन्,' राउतले भने ।

ल्यापटप र मोबाइलमा प्रहरीको ध्यान

प्रहरीले सीके राउतलाई पक्राउ गर्नु भन्दा उनको मोबाइल र ल्यापटप जफत गर्न खोजेको छ । राउत बसेको घर घेराउको कमाण्ड गरिरहेका प्रहरी निरीक्षक रामकिशोर साहले मोबाइल र ल्यापटप बुझाउन भनेको राउतले जानकारी दिए । 'इन्सपेक्टर रामकिशोर साहसँग कुराकानी भयो, उनले हामी तपाईंको मोबाइल र ल्यापटप जफत गर्न चाहन्छौँ, भन्नुभयो,' प्रहरीसँगको कुराकानी उद्धृत् गर्दै राउतले भने ।

ताला नै तालाभित्र राउत !

राउत जनकपुर उपमहानगरपालिका वडा नम्बर ४ स्थित परिक्रमा सडक खण्डको माछा बजारमा रहेको ३ तले घरमा डेरा गरी बस्छन् । सामान्यतया उनी घरमा रहेको च्यानल गेटमा भित्रबाहिरैबाट ताला लगाएर बस्ने गरेका छन् । अहिले पनि घरमा भित्रबाहिरै ताला लगाइएको छ । 'कि त पक्राउ पूर्जी लिएर आउनुपर्‍यो, म आफैँ गिरफ्तारी दिन्छु, होइन भने ताला फोरेर आए हुन्छ,' राउतले भने ।

प्रहरीले बलिदानी दिवसको अवसर पारेर सिरहामा आयोजित कार्यक्रममा सहभागी हुनसक्ने आशंकामा राउतलाई घेराबन्दी गरेको हो । घरमा नै बसेर मोबाइल र ल्यापटपबाट विखण्डनकारी गतिविधि गर्न सक्ने भएकाले मोबाइल र ल्यापटप जफत गर्न खोजिएको प्रहरी स्रोतको भनाइ छ ।

मधेशी जनअधिकार फोरमको नेतृत्वमा भएको मधेश आन्दोलनका क्रममा ०६३ साल माघ ५ गते सिराहाको लहानमा प्रहरी कारबाहीमा परी रमेश महतोको मृत्यु भएको थियो । सोही दिनको सम्झनामा मधेशकेन्द्रित दलहरुले बलिदानी दिवस मनाउने गरेका छन् ।

यसैक्रममा शहीद महतोको शालिक अघि सीके राउतको संगठनले आयोजना गरेको रक्तदान कार्यक्रम प्रहरीले बिथोलेको छ । त्यसक्रमा संगठनका सिरहा संयोजक बालेश्वर यादवलाई प्रहरीले पक्राउगरेको छ ।