काठमाडौं, ६ माघ– नेकपा एमाले र नेकपा माओवादी केन्द्र पार्टी एकताका लागि अन्तिम गृहकार्यमा जुटेका छन् । दुई पार्टीबीच पार्टी एकताका बारेमा शनिबार पनि छलफल हुँदैछ । 

आइतबार पार्टी एकता समन्वय समितिको बैठक बस्नुअघि एकताको खाकाबारे छलफल हुन लागेको हो । एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्डबीचको शुक्रबार भएको भेटमा पार्टी एकतालाई छिटै टुंगोमा पुर्याउने सहमतिअनुसार शनिबार थप छलफल हुन लागेको हो । ओली र प्रचण्डबीचको भेटमा अन्तिम खाका बनाएको बताइएको छ ।  

पहिलो खाका- ओली र दाहाल दुवै अध्यक्ष ।
एमालेका पदाधिकारीलाई यथावत् राखेर माओवादी केन्द्रबाट केही थप्ने ।

दोस्रो खाका- प्रधानमन्त्रीमा ओली, पार्टी अध्यक्ष दाहाल ।

स्रोतका अनुसार ओली र दाहालमध्ये एक सर्वाेच्च नेता र अर्का अध्यक्ष रहने गरी मोडालिटी टुंगो लागेको छ । जुन पद भएपनि एमाले अध्यक्ष ओली नै प्रधानमन्त्री र संसदीय दलका नेता हुने प्रस्ताव दाहालले राखेका छन । 

बार्तामा ओलीले एकताका लागि आफू कहाँ रहने भन्ने प्रस्ताव आफै नगर्ने जानकारी दाहाललाई गराएका थिए भने दाहालले पनि सोही भनाई ओलीसामु राखेका थिए ।
एकताबारे विभिन्न आशंका र षडयन्त्रलाई चिरेर छोटो र छिटो विधिबाट पार्टी एकता टुंगोमा पुर्याउने समझादारी बनेको छ । यसका लागि दुईवटा खाका बनेको श्रोतको दावी छ । 

दुई पार्टीबीचको छलफलमा पार्टी एकतासँगै राष्ट्रियसभाको गठन र प्रदेश सरकारको विषयमा पनि कुरा हुने नेताहरुले बताएका छन् । राष्ट्रियसभामा वाम गठबन्धनले ५६ मध्ये ४३ पदका लागि उम्मेदवारी दिने निर्णय गरिसकेको छ । निर्णयमा एमालेलाई २९ र माओवादीलाई १४ पद दिने सहमति भए पनि त्यसलाई सामान्य हेरफेर गर्ने तयारी छ ।