बुटवल, ६ माघ- प्रदेश नम्बर ५ का सांसदहरुको शपथ ग्रहण भोलि (आइतबार) हुने भएको छ । शपथ ग्रहण बुटवल उद्योग वाणिज्य संघको भवनमा हुनेछ । प्रदेश प्रमुख उमाकान्त झाले आफ्नो शपथ ग्रहणलगत्तै प्रदेश सांसदको शपथ ग्रहणको समय तोकेका हुन् ।

आइतबार बिहान ११ बजेका लागि शपथ ग्रहण कार्यक्रम तय भएको झाले बताए । लोकान्तरसँगको कुराकानीमा झाले भने, ‘मैले पदभार ग्रहण गरेलगत्तै समयमै (११ बजे) सांसदहरुको सपथ ग्रहण गराउँछु ।'

बुटवल उद्योग बाणिज्य संघको सभाहललाई सपथ ग्रहणका लागि सजाइएको छ । प्रदेश नम्बर ५ मा १२ जिल्लाका प्रत्यक्षतर्फ ५२ र समानुपातिक तर्फका ३७ गरी ८७ सांसद छन् ।

५ सयजना अट्ने क्षमताको सभाहलमा सपथ ग्रहणका लागि सांसद, पत्रकार, आमन्त्रित अतिथिहरुलाई छुट्टा–छुट्टै स्थान तोकिएको छ । शपथ ग्रहण गराउनका लागि प्रदेश प्रमुख उमाकान्त शनिबार रुपन्देही आइसकेका छन् ।
सांसदहरु पनि बुटवल आउने क्रम जारी छ ।

प्रदेश प्रमुख झाले आइतबार नै पदबहाली गर्नेछन् । उनले बिहान १० बजे रुपन्देही व्यापार संघको भवनमा पदभार ग्रहण गर्नेछन् ।

प्रमुख जिल्ला अधिकारी हरिप्रसाद मैनालीले शपथ ग्रहणको तयारीसंगै सुरक्षामा पनि विशेष प्रबन्ध मिलाइएको जानकारी दिए । सशस्त्र, जनपथ र राष्ट्रिय अनुसन्धानका कर्मचारीहरुको ३ घेरामा सुरक्षा व्यवस्था मिलाइएको उनले बताए ।

पश्चिम क्षेत्रीय ट्राफिक प्रहरी कार्यालयले ट्राफिक व्यवस्था भोलिको लागि चुस्त बनाउने बताएको छ । बसपार्कबाट ई–रिक्सालाई हटाइने भएको छ र आउने आगन्तुक तथा नेताहरुको पार्किङका लागि मानव धर्म सेवा समाजको कम्पाउण्ड प्रबन्ध गरिएको ट्राफिक प्रहरीले जनाएको छ ।

शपथ ग्रहण हुने सभाहललाई नै तत्कालका लागि प्रदेशसभा बैठक स्थलका रुपमा प्रयोग गरिने छ । उद्योग वाणिज्य संघको सचिवालयमा नै सभामुख र उपसभामुखको कार्यकक्षसहित संसद सचिवालय राखिने बताइएको छ । प्रदेश मन्त्रालयका लागिसमेत भवन व्यवस्थापन भइसकेको छ । मन्त्रालयहरु बुटवलमै बनेको श्रम कार्यालयको छ तले भवनमा राखिने भएको छ । 

त्यहाँ नअटेका मन्त्रालयका लागि वन, राजश्व लगायतका कार्यालयमा व्यवस्थापन गरिनेछ । बुटवलमा प्रादेशिक कार्यालय व्यवस्थापन गर्दै भैरहवा क्षेत्रमा आवास बनाउने तयारी गरिएको छ । प्रदेश कार्यालय बन्ने भएपछि सुरक्षा निकायले पनि त्यसको तयारी गरिरहेको छ । प्रमुखको सचिवालय, सभा स्थल र निवास क्षेत्रलाई सुरक्षा निगरानीमा राखिएको छ ।