काठमाडौं, ७ माघ — काबुलस्थित विलासी होटललाई आतंकवादीहरूको कब्जाबाट मुक्त पार्नका लागि अफगानी सुरक्षाफौजहरू सफल भएका छन् । शनिवार साँझ आतकंवादी लडाकूको एक समूहले बन्दुकसहित होटलमा प्रवेश गरेर धेरै व्यक्तिको हत्या गरेको थियो । 

इन्टरकन्टिनेन्टल होटलमा उपस्थित अतिथि र कर्मचारीमाथि उनीहरूले अन्धाधुन्ध गोली प्रहार गरेका थिए । 

दुई आक्रमणकारीहरूलाई मारिएको छ भने अन्य चाहिँ माथिल्ला तल्लाहरूमा लुकेर बसेका अधिकारीहरूले बताएका छन् । 

कम्तीमा पाँच सर्वसाधारणको हत्या भएको र ६ जना घाइते भएको अफगानिस्तानको गृह मन्त्रालयका एक प्रवक्ताले बताए । 

आक्रमण स्थानीय समयअनुसार, राति ९ बजे शुरु भएको थियो । बन्दुकधारीहरूले सुरक्षा गार्डहरूमाथि गोली प्रहार गरेका थिए अनि ६ तल्ले होटल छिर्ने क्रममा ग्रिनेड पडेकाएका थिए । 

विशेष सुरक्षादस्तालाई बोलाइनुअघि उनीहरूले कर्मचारी र अतिथिहरूलाई लक्ष्य बनाएका थिए । 

अहिले सुरक्षाबलले होटलको धेरैजसो भागलाई नियन्त्रणमा लिइसकेका छन् र उनीहरू माथिल्लो तल्लालाई सुरक्षित बनाउन संघर्ष गरिरहेका छन् । त्यहाँ कोही मानिस फसेका भए उनीहरूको उद्धार गरिने गृहका प्रवक्ताले बताए । 

अहिलेसम्म सयभन्दा बढी अतिथिहरूलाई उद्धार गरिएको उनले थपे । 

केही रिपोर्टहरूमा आएअनुसार, होटलमा सूचना प्रविधिसम्बन्धी एउटा सम्मेलन चलिरहेको थियो अनि त्यसमा प्रान्तीय अधिकारीहरूले भाग लिइरहेका थिए । रोयटर्स समाचार संस्थालाई एक प्रत्यक्षदर्शीले बताएअनुसार आक्रमणकारीहरूले केहीलाई बन्धक बनाएका छन् । 

काबुलस्थित अमेरिकी दूतावासले शहरका होटलहरूमा आक्रमण हुन सक्ने चेतावनी दिएको केही दिनमा यो आक्रमण भएको हो । 

बीबीसीबाट