धनगढी, ८ माघ -प्रदेश नं. ७ अन्तरगत आइतवार धनगढीमा आयोजित प्रदेश सभा सांसदहरुको शपथ ग्रहण कार्यक्रममा शपथ नलिने सांसद विरुद्ध उजुरी परेको छ ।

शपथ ग्रहण नगरेको भन्दै डोटीकै विष्णा सिंहले डोटीकै सांसद भारत खड्काको नाम मतदाता नामावलीबाट हटाउनु पर्ने भन्दै सांसद खड्का विरुद्ध उजुरी दर्ता गराएकी छिन् । उनले राष्ट्रिय सभा सदस्य निर्वाचनको लागि डोटीमा स्थापना भएको निर्वाचन अधिकृतको कार्यालयमा उजुरी दर्ता गराएकी हुन् ।

निर्वाचन अधिकृत जयानन्द पनेरुले दर्ता भएको उक्त उजुरी सोमवार प्रकाशित गरेको बताए । सांसद खड्का छोरीको बिबाह भएको कारण देखाउँदै आइतबार भएको शपथ ग्रहण समारोहमा अनुपस्थित रहेका थिए । 

उजुरी सार्वजनिक गर्दै निर्वाचन अधिकृत पनेरुले मंगलवार दिउँसो ३ बजेसम्म उजुरी खण्डन गर्न आवश्यक प्रमाण पेश गर्न खडकालाई आग्रह गरेको जनाए । मंगलवार ३ बजेसम्म प्राप्त प्रमाण अनुसार कारवाहीको प्रक्रिया अगाडी बढ्ने जनाइएको छ । 

सांसद खड्काले शपथ ग्रहण समारोहमा उपस्थित हुन नसक्नुको कारण प्रमुख प्रदेशलाई जानकारी गराएको अवस्थामा दर्ता भएको उजुरीले केहि फरक पर्ने क्षेत्रीय निर्वाचन कार्यालय धनगढीका प्रमुख मोहन अर्यालले बताए ।