काठमाडौं, १२ माघ — सिरियाको मजबिस शहरमा अमेरिकी तथा टर्किश सेना आमनेसामने भएका छन् । 

पहिलोपटक अमेरिकी नेतृत्वको नाटो संगठनको सदस्य मुलुकका सेनाबीच प्रत्यक्ष युद्धको स्थिति उत्पन्न भएको छ । 

टर्कीले पाँच दिनदेखि उत्तरी सिरियाका विभिन्न क्षेत्रमा रहेका कुर्दिश लडाकूहरूको सफाया कारवाही चलाइरहेको छ । टर्किश सेना ट्यांक लिएर कुर्दहरूको आफरीन शहरमा घुसेको छ ।

यो लडाईंमा लगभग ३०० मानिसको मृत्यु भइसकेको छ । टर्कीको सेना मजबिस शहरतर्फ जाँदैछ । त्यहाँ २५ सय अमेरिकी सैनिक र रणनीतिकारहरूले कुर्दहरूलाई सैन्य तालिम तथा हतियार आपूर्ति गर्ने गरेका छन् । 

अमेरिकाका राष्ट्रपति डोनल्ड ट्रम्पले टर्कीका राष्ट्रपति रेसेप तैय्यप अर्दोगानलाई चेतावनी समेत दिएका छन् । 

ह्वाइट हाउसका अनुसार, ट्रम्पले अर्दोगानलाई सिरियाली क्षेत्रमा अमेरिकी र टर्किश सेनाबीच युद्ध स्थिति नल्याउन चेतावनी दिएका हुन् । 

टर्कीले चाहिँ ह्वाइट हाउसले झुटो बोलेको आरोप लगाएको छ । ट्रम्पले युद्ध रोक्न कुनै कुरा नगरेको टर्कीको भनाइ छ । 

अर्दोगानले टर्किश सेना मजबिस शहरतर्फ अघि बढेको र आफूहरूले कुर्दहरूलाई लखेट्ने बताए । 

ट्रम्प राष्ट्रपति भएयता एक वर्षभित्र १४ देशका राष्ट्रप्रमुखहरूलाई हप्काइसकेका छन् । 

कुर्द लडाकूहरूले टर्कीमाथि गरेको क्षेप्यास्त्र आक्रमणमा मस्जिद ध्वस्त भयो अनि दुई मानिस समेत मारिए । 

खासमा टर्कीमा कुर्दिश लडाकूहरूलाई आतंकवादी भन्ने गरेको छ । अर्दोगानका अनुसार, दशकौंदेखि कुर्दिश लडाकूहरूले टर्कीमा अशान्ति फैलाइरहेका छन् । उनीहरूले सताएका सिरियालीहरू टर्कीमा शरण लिन आएको
अर्दोगानको भनाइ छ । 

सिरियामा कुर्दहरू नै अमेरिकाका सबभन्दा ठूला सहयोगी हुन् । उनीहरू सिरियाली राष्ट्रपति बशर अल असद र आईएसविरुद्ध लडाईं गरिरहेका छन् । त्यसैले पनि ट्रम्पले टर्कीलाई चेतावनी दिएका हुन् । 

एजेन्सी