राजबहादुरको उतारचढावपूर्ण यात्रा : सर्वस्वहरणदेखि प्रदेश सभामुखसम्म

माघ २९, २०७४

सुर्खेत, २९ माघ– कुनै बेला तीनपटकसम्म अपहरणमा परेका, सर्वस्वहरण गरिएका व्यक्ति सभामुख बन्लान भन्ने धेरैलाई लागेकै थिएन । तर समय अनुसार परिस्थिति पनि बदलिँदो रहेछ । हिजो सर्वस्वहरणमा परेका व्यक्तिले प्रदेस सभा हाँक्ने अवसर पाएका छन्, ती व्यक्ति हुन प्रदेससभा सदस्य राजबहादुर शाही ।

दैलेख जिल्लाको विकट साविकको ठाँटीकाँध गाविस वडा नं. ७, छडाथान हालको ठाँटीकाँध गाँउपालिका वडा नं ६ मा विसं. २०२६ साल मंसिर २१ गते जन्मेका राजबहादुर शाही सरल र शान्त स्वभावका छन् । आफ्नोलागि कुनै पद चाहियो भनेर भन्न नरुचाउने शाहीले २०३९ सालमा नेमकिपाको विद्यार्थी संगठनको सदस्यता लिएर राजीतिक जीस्वनको सुरुवात गरेका थिए । 

विद्यार्थी संगठनमा आवद्ध भईरहँदा विसं. २०४५ साल अर्थात १९ वर्षको उमेरमा नेमकिपाको पार्टी सदस्यता प्राप्त गरेका शाही २०४७ सालमा महेन्द्र बहुमुखी क्याम्पस नेपालगञ्जको नेक्राविसंघका अध्यक्ष बने ।

विद्यार्थी राजनीतिबाट पार्टी राजनीतिमा सरिक हुनुपर्छ भन्ने धारणका साथ उनी विसं २०४८ मा नेमकिपाको जिल्ला कमिटि सदस्य बने । उनी दैलेखमा अन्य नेताभन्दा कम अवसर पाउने व्यक्तिमा गिन्ति हुन्छन् । २०५२ सालमा नेमकिपाको अधिकांश जिल्ला कमिटि नेकपा एमालेमा समाहित भयो । उक्त एकिकरण पश्चात उनि एमालेको जिल्ला कमिटि सदस्य समेत बने ।

समयक्रम बदलियो । सरकारले २०५४ सालमा स्थानीय निकायको निर्वाचन ग¥यो । उक्त निर्वाचनमा नेता शाही गाविस तोलिजैसी गाविसको अध्यक्ष पदमा चुनाव लडेर विजय प्राप्त गरे । लगत्तै उनि गाविस राष्ट्रिय महासंघको जिल्ला अध्यक्ष समेत बने । विसं. २०६९ सम्म नेता शाही एमालेको जिल्ला कमिटि सदस्य रहिरहे । 

तत्पश्चात २०६९ सालदेखि एमालेको नवौं महाधिवेशनसम्म उनी एमालेको अञ्चल समन्वय कमिटिको सदस्य बने । र अहिले आइपुग्दा उनी पार्टीको कुनै पनि जिम्मेवारीमा रहेका छैनन् ।

सर्वस्वहरणमा पर्नु 

अब माओवादी सांसदहरुले उनलाई ‘माननीय सभामुखज्यू’ भनेरै सम्वोधन गर्नेछन् ।

तत्कालिन सशस्त्र संघर्षरत नेकपा माओवादीले उनलाई विसं. २०६० मा दुइपटक, २०६१ मा एकपटक अपहरण ग¥यो । अपहरणपश्चात माओवादीले उनको सर्वस्वहरण समेत ग¥यो । अहिलेसम्म पनि नेता शाहीको घर खाली छ । 

तर अब माओवादी सांसदहरुले उनलाई ‘माननीय सभामुखज्यू’ भनेरै सम्वोधन गर्नेछन् । उसोत राजबहादुरले पनि विगतमा तिक्तता बिर्षीसकेका छन् । माओवादीसंगको चुनावी तालमेलमा उनी विजयी भएका हुन् । 

त्यो भन्दा पहिले नेता शाहीले २०४६ सालको जनआन्दोलनमा नेपालगञ्जमा जेल समेत पर्नुप¥यो । यस्ता कयौं आन्दोलनमा उनले सक्रिय सहभागिता जनाएको एमालेका कार्यकर्ताहरु बताउछन् ।

लाभको पदमा दोस्रोपटक

३५ वर्षे राजनीतिमा करिब दुइपटक मात्र उनले लाभको पद पाएका छन् । पहुँचका आधारमा पद पाइने नेपालमा विना पहँच, जनताको चाहना र सफल नेतृत्वदायी भूमिकाका कारण २०५४ सालमा ठाँटीकाँध गाविस अध्यक्ष र २०७४ सालमा दैलेख जिल्ला निर्वाचन क्षेत्र नम्बर २ प्रदेशसभा ‘ख’ बाट प्रदेशसभा सदस्यमा निर्वाचित भए । र आज उनी प्रदेशकै सम्मानित पद सभामुख बन्दैछन् ।

‘सबैलाई मिलाएर लैजान्छु’

सभामुख पदकालागि मनोनयन दर्ता गरेका नेता राजबहादुर शाहीले प्रदेससभामा भएका सबै राजनीतिक दलहरुलाई मिलाएर लैजाने बताए । ‘हाम्रो प्रदेश सबैभन्दा पछि परेकाले सबै दलहरुको सहकार्यले मात्रै यो प्रदेशको समृद्धि सम्भव छ’ उनले लोकान्तरसँग भने, ‘त्यसैले सवै राजनीतिक दलहरुमा विकास निर्माणका लागि एकता हुन आवश्यक छ ।’ उनले प्रदेशको मुहार परिवर्तन गर्न सभामुखका हैसियतले पहल गर्ने बताए ।
 

माघ २९, २०७४ मा प्रकाशित

शेरबहादुर थापा

थापा लोकान्तरकालागि कर्णाली प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस