रोमान्टिक उपन्यास लेख्नेहरूले कमाउँछन् करोडौं रुपैयाँ

माघ २९, २०७४

काठमाडौं, २९ माघ — पुस्तक मानिसको सबभन्दा असल मित्र हो । अनि एक असल मित्रको खोजीमा सबै हुन्छन् । 

कुनै समयमा मानिस सोख पूरा गर्न किताब लेख्थे । आफ्ना अनुभव, समाजलाई हेर्ने दृष्टिकोण र आफ्नो सोचलाई किताबको रूप दिएर उनीहरू सबैसमक्ष ल्याउँथे । आज भने यो एक ठूलो व्यापार भइसकेको छ । 

अहिले त किताबको संसारमा एकअर्कालाई उछिन्ने होडबाजी चलेको छ । राम्रो किताब लेख्नु कुनै ठट्टाको विषय होइन । लेखकले यसका लागि बहुमूल्य समय छुट्ट्याउनुपर्छ । अनि बल्ल उम्दा किताब चाहने व्यक्तिहरूसम्म पुग्छ । 

लेखक पनि मानिसहरूले आफ्नो कामको प्रशंसा मात्र नगरून्, उचित पारिश्रमिक पनि पाइयोस् भनी आशा गर्छन् । 

आजकल हामी डिजिटल संसारमा बाँचिरहेका छौं । संसार नै स्मार्टफोन, ल्यापटप र कम्प्युटरमा अटाएको छ । हामी फोनमा अत्यधिक समय बिताउँछौं । मानिसको यो कमजोरीलाई लेखकहरूले पनि बुझेका छन् । 

लेखकले कुनै प्रकाशक पाएनन् भने आफैं अन्लाइन पुस्तक उपलब्ध गराउँछन् । उनीहरूको कामलाई कदर गर्ने मानिस अन्लाइन नै भेटिन सक्छन् । 

अन्लाइनमा तपाईंले जस्तो किताब पनि फेला पार्नुहुन्छ । तर आजकल रोमान्सका बारेमा लेखिएका पुस्तकले मानिसहरूलाई बढी आकर्षित गरिरहेको छ । अंग्रेजीको रोमान्टिक उपन्यास फिफ्टी शेड्स अफ ग्रे संसारभरि खुबै
रुचाइयो । किताब टन्न बिकेर यसकी लेखिका करोडपति भइसकिन् । 

लेखिका ईएल जेम्सका अनुसार, ईबूकको चलनले रोमान्समाथि किताब लेख्नेहरूलाई अतिरिक्त कमाउने अवसर दिएको छ । 

एक अनुसन्धानले रोमान्टिक किताब लेख्नेहरूको तुलनामा गम्भीर विषयमा लेख्नेहरूको कमाइमा ३० प्रतिशतले कमी आएको देखाएको छ । 

अनुसन्धानले त के पनि देखाउँछ भने रोमान्समाथि लेख्नेहरूका लागि यो मात्र कमाइको माध्यम होइन । उनीहरू अन्य रोजगारी पनि गर्न पाउँछन् र कमाउँछन् । गम्भीर विषयमा लेख्नेहरूले चाहिँ धेरै समय छुट्ट्याउनुपर्छ । 

त्यसैले उनीहरूले अरू काम गर्न पाउँदैनन् । त्यसैले उनीहरूको कमाइ पनि घट्दैछ । 

खासमा रोमान्समा लेख्नेहरूले सामान्यतया स्वतन्त्र रूपमा काम गर्छन् । अमेरिकामा लगभग एक तिहाइ मानिस स्वतन्त्र रूपमा कमाइरहेका छन् । 

सन् २०१७ को अन्त्यसम्ममा अमेरिकाको लगभग आधी जनसंख्या अतिरिक्त कमाइको यही विकल्पमा काम गरिरहेको हुनेछ । गम्भीर विषयमा लेख्नेहरूले उनीहरूबाट केही कला सिक्न सक्छन् । 

रोमान्स लेखकहरूको कमाइ किन बढिरहेको हो भने उनीहरूको किताब अन्लाइन बढी बिक्छ । तर उनीहरू सफल हुनुका कारण के हुन् ?

सन् १९७० मा अमेरिकामा रोमान्स लेख्ने नयाँ लेखकहरूलाई ठूला लेखकहरूले नकारेपछि सबैले मिलेर एउटा संस्था बनाए । त्यसको नाम रोमान्स राइटर्स अफ अमेरिका थियो । अहिले लगभग १० हजार लेखक त्यसका सदस्य छन्
। 

सन् १९८०मा यस संस्थाले काम गर्न शुरू गर्दा नयाँ लेखकलाई ठाउँ दिइएको थियो ।

रोमान्स राइटर्स अफ अमेरिकाले नयाँ लेखकलाई मञ्च मात्र दिएन, उनीहरूको कला निखार्नका लागि कैयौं वर्कशप पनि आयोजना ग–यो । 

अनुभवी लेखकले नयाँ लेखकलाई मार्गनिर्देशन गर्छन् । साथै यी लेखकको काम अन्लाइन प्रकाशित गर्ने चाँजोपाँजो पनि मिलाउँछन् । केही लेखकहरूले त अन्लाइन सेल्फ पब्लिशिङ एड्भाइजरी ग्रूप समेत बनाएका छन् र नयाँ
लेखकलाई सल्लाह दिने गरेका छन् । 

यी अनुभवी लेखकहरूले नयाँलाई सल्लाह दिने मात्र होइन, उनीहरूको विचार बुझेर कार्यान्वयन पनि गर्ने गरेका छन् । यसरी उनीहरू दुवैले आफ्नो काममा निखार ल्याउने गरेका छन् । 

फ्रीलान्स काम गर्ने लेखकहरूले यी अनुभवी लेखकबाट फाइदा लिएर आफ्नो आम्दानी बढाउन सक्छन् । 

बीबीसी हिन्दीबाट
 


ADVERTISEMENT

माघ २९, २०७४ मा प्रकाशित

प्रतिक्रिया दिनुहोस