काठमाडौं, १ फागुन — माल्दिभ्समा चलिरहेको राजनीतिक संकटमा त्यहाँका पूर्वराष्ट्रपति मोहम्मद नशीदले भारतलाई लगातार सैन्य हस्तक्षेप गर्ने आह्वान गरेपनि चीनले भने त्यहाँ विदेशीको हस्तक्षेपविरुद्ध चेतावनी दिएको छ । 

चीनले सोमवार माल्दिभ्समा चलिरहेको राजनीति त्यहाँको आन्तरिक विषय भएको अनि देशका सबै दलहरू मिलेर कुराकानीमार्फत समस्या समाधान गर्नुपर्ने बतायो । 

चीनले जारी गरेको बयानमा भनिएको छ, ‘हामीलाई माल्दिभ्स सरकार र त्यहाँका जनताको बुद्धिमत्तामा विश्वास छ र उनीहरूसँग वर्तमान समस्याको सही समाधान अनि देशमा विधिको शासन स्थापना गर्ने क्षमता छ ।’

भारतमा रहेको चिनियाँ राजदूतावासले बयान जारी गरेको हो । मोहम्मद नशीदले माल्दिभ्सका जमीनमाथि चीनले कब्जा गरेको आरोपको जवाफमा यो बयान जारी भएको हो । 

अघिल्लो साता नशीदले एक अन्तर्वार्तामा चीनले गर्ने जमीन कब्जाका घटनासँग लड्नका लागि अन्तर्राष्ट्रिय सम्मेलन आयोजना गर्ने बताएका थिए । चीनले माल्दिभ्सका द्वीपसमूहमध्ये १७ वटा साना टापुमा कब्जा गरेको उनको भनाइ छ । 

नयाँ दिल्लीस्थित चिनियाँ दूतावासले नशीदमाथि राजनीतिक उद्देश्यका साथ यस्तो टिप्पणी गरेको आरोप लगाएको छ । माल्दिभ्सलाई आफूले गरेको सहयोग व्यावहारिक भएको बताउँदै दूतावासले नशीदको बयान झुटो र आधारहीन भएको टिप्पणी ग–यो । 

नशीदको माल्दिभियन डेमोक्रेटिक पार्टीका अनुसार, चीनको धेरैजसो लगानी र परियोजनामा पारदर्शिताको कमी छ । 

नशीद राष्ट्रपति हुँदा नै चीनले केही महत्त्वपूर्ण परियोजना शुरू गरेको थियो अनि अहिले आएर उनले जमीनमा कब्जा गरेको आरोप लगाउनु राजनीतिक उद्देश्यले प्रेरित भएर गरेको चीनको भनाइ छ । 

एजेन्सी