किम जोङ–उनले गरे दक्षिण कोरियाको प्रशंसा, शान्ति स्थापनाको प्रयास गर्ने दिए भरोसा

फागुन १, २०७४

काठमाडौं, १ फागुन — उत्तर कोरियाका सर्वोच्च नेता किम जोङ–उनले दक्षिण कोरियासँग शान्तिको वातावरण कायम राख्ने बताएका छन् । उत्तर कोरियाको सरकारी एजेन्सीले यसको पुष्टि गरेको छ । 

ताजा बयानमा किमले शान्तिबहालीको कोशिश गरेकोमा दक्षिण कोरियाको प्रशंसा गरे । 

एजेन्सीका अनुसार, किमले दक्षिण कोरियाबाट फर्केका उत्तर कोरियाली प्रतिनिधिमण्डलले तयार पारेको रिपोर्ट हेरेपछि यस्तो बयान दिएका हुन् । 

प्रतिनिधिमण्डलमा किमकी बहिनी किम यो–जोङ पनि संलग्न थिइन् र उनले प्योङचाङमा भइरहेको शीतकालीन ओलम्पिक समारोहमा भाग पनि लिएकी थिइन् । 

एजेन्सीको यो रिपोर्टमा उत्तर कोरियाले दक्षिणका राष्ट्रपति मून जे–इनलाई आफ्नो देश भ्रमणको निम्तो दिएको विषय पनि उल्लेख छैन । 

ओलम्पिक खेलको आरम्भ भएको भोलिपल्टै उत्तरले दक्षिणका राष्ट्रपतिलाई आफ्नो देश आउने निमन्त्रण दिएको खबर आएको थियो । 

अमेरिकाले चाहिँ उत्तर कोरियासँग निकटता बढाउनु खतरनाक भएको चेतावनी दिएको छ । 

अमेरिकाको डोनल्ड ट्रम्प प्रशासनले उत्तर अझै आणविक कार्यक्रम जारी राखिरहेको अनि तनावका बेलामा भइरहेको शीतकालीन ओलम्पिक खेलमा दक्षिण कोरियाले उत्तरको भ्रममा नपरी सतर्कता अपनाउनुपर्ने बताएको छ । 

शनिवार मात्र अमेरिकाका उपराष्ट्रपति माइक पेन्सले उत्तर कोरियाको प्रोपागान्डालाई अमेरिकाले विश्वस्तरमा सफल हुन नदिने बताएको छ । 

बीबीसी हिन्दीबाट
 

फागुन १, २०७४ मा प्रकाशित

प्रतिक्रिया दिनुहोस