काठमाडौं, ३ फागुन — अमेरिकाको फ्लोरिडामा रहेको एक विद्यालयमा बिहीवार बिहान भएको आक्रमणका विषयमा नयाँ खुलासा भएको छ । आक्रमणकारी विद्यार्थी निकोलस क्रूजलाई अनुशासन तोडेकोमा स्कूलबाट केही समयअघि निकालिएको रहेछ । 

स्कूलबाट निकालिएपछि रन्थनिएका क्रूजले सेमीअटोमेटिक एआर–१५ राइफलले जथाभावी गोलीप्रहार गर्दै १७ जनाको हत्या गरे । 

नेपाली समयअनुसार बिहीवार बिहान १ बजेर २५ मिनेट जाँदा भएको यो घटनामा विद्यार्थी र कर्मचारी गरी १७ को मृत्यु भएको छ भने थुप्रै गम्भीर घाइते छन् । 

मायामीभन्दा लगभग ७२ किलोमिटर पर रहेको पार्कल्यान्ड इलाकाको मार्जरी स्टोनम्यान डग्लस हाईस्कूलमा यो गोलीकाण्ड भएको थियो । 

ब्रोवार्ड काउन्टीका शेरिफ स्कट इजरायलले बताएअनुसार, आरोपित क्रूजले पहिला स्कूलबाहिर फायरिङ गरे जसमा परी तीनजनाको मृत्यु भयो । त्यसपछि उनी भवनमा घुस र १२ जनाको हत्या गरे । दुई घाइतेले अस्पतालमा ज्यान गुमाए । 

प्रहरी अधिकारीहरूका अनुसार, क्रूजले स्कूल छुट्टी हुनुभन्दा केही समयअघि घटना गराएका थिए । उनले पहिले स्कूलको फायर अलार्म बजाए । त्यो सुनेर भागदौड मच्चियो । अनि उनले क्लासरूमदेखि लिएर भवनबाहिरसम्म प्रहार गरे । 

आक्रमणपछि निकोलस क्रूज भागे । उनलाई केही घन्टापछि नजिकैको शहर कोरल स्प्रिङबाट पक्राउ गरियो । 

गोलीकाण्डपछि भागिरहेको विद्यार्थीमाझ लुकेर उनी भागेका थिए । प्रहरीका अनुसार, उनीसँग थुप्रै हतियार छन् । 

आक्रमणको एउटा भिडियो सामाजिक सञ्जालमा भाइरल भइरहेको छ । त्यसमा एक विद्यार्थी आत्तिएर चिच्याइरहेको सुनिन्छ । भिडियोमा ४० चोटिभन्दा बढी फायरिङको आवाज सुनिन्छ ।

एजेन्सी