काठमाडौं, ३ फागुन — दक्षिण अफ्रिकाका राष्ट्रपति ज्याकब जुमाले बुधवार पदबाट राजीनामा दिएका छन् । उनको अफ्रिकन नेसनल कंग्रेस पार्टीले उनीविरुद्ध संसदमा अविश्वासको प्रस्ताव ल्याएर हटाउने तयारी गरिरहेको थियो । 

राजीनामा दिँदै जुमाले भने, ‘म पार्टीको निर्णयसँग सहमत छैन तर आफ्नो दलको अनुशासित सदस्य हुँ ।’

भ्रष्टाचार मुद्दामा भारतीय मूलका व्यापारीहरू अजय, अतुल र राजेश गुप्ता पक्राउ परेपछि जुमा अप्ठ्यारोमा परेका थिए । गुप्ता दाजुभाइलाई जुमाले गलत तरिकाले फाइदा पु–याएको आरोप लगाइएको थियो । 

जुमाले सरकारी टीभीमा राजीनामाको घोषणा गरे । उनले भने, ‘म तत्कालै लागू हुने गरी दक्षिण अफ्रिकाको राष्ट्रपति पदबाट राजीनामा दिन्छु ।’ राजीनामा दिएपछि जुमाको नौ वर्षे शासनकालको अन्त्य भयो । सन् २०१९ मा उनको
दोस्रो तथा अन्तिम कार्यकाल सकिन्थ्यो तर त्यसअघि नै उनी राजीनामा दिन बाध्य भए । 

जुमाको स्थानमा साइरिल रामाफोसालाई अन्तरिम राष्ट्रपति बनाइनेछ । रामाफोसालाई राष्ट्रपति बनाउने निर्णय गर्नु सही नभएको जुमाले बताए । रामाफोसा यसअघि नै एएनसी पार्टीका अध्यक्ष बनेका थिए । 

राष्ट्रपति जुमाले राष्ट्रपति पद छोडेपनि पार्टीको सेवा गरिरहने बताएका छन् । 

विपक्षी दलहरूले जुमाविरुद्ध यसअघि थुप्रैचोटि अविश्वासको प्रस्ताव ल्याएका भएपनि सफल भएका थिएनन् । 

एजेन्सी