काठमाडौं, ३ फागुन — भारतको पञ्जाब नेसनल बैंकबाट ११ हजार ४ सय करोड भारु घोटाला भएको विषयले अहिले भारत हल्लिएको छ । देशको सबभन्दा ठूलो बैंकिङ घोटालाका मुख्य आरोपित प्रसिद्ध अर्बपति नीरव मोदी हुन् । 

गरगहना व्यवसायी मोदीको नाम विश्वका धनीहरूमा ८५औं स्थानमा छ । पञ्जाब नेसनल बैंक घोटालाका मास्टरमाइन्ड मोदी कसरी अर्बपति व्यापारी बने त ? 

मोदी संसारको हीरा राजधानी मानिने बेल्जियमको एन्टवर्पका प्रसिद्ध डायमण्ड ब्रोकर परिवारसँग सम्बन्ध राख्छन् । शुरूमा यो व्यवसायमा आउन नचाहेका मोदीलाई उनको साथीले इयररिङ डिजाइन गर्न लगाएपछि गहना डिजाइनमा रुचि जाग्यो र त्यसैलाई पेशा बनाउन थाले । 

उनले सन् १९९९ मा फायरस्टार कम्पनी बनाए । 

सन् २०१३ मा आइपुग्दा नीरव मोदी अर्बपतिहरूको फोर्ब्स लिस्टमा आइसकेका थिए । उनका गहना पसल लन्डन, न्युयोर्क, लस भेगास, हवाई, सिंगापुर, बेइजिङलगायतका १६ शहरमा छन् । 

नीरवले सन् २०१० मा आफ्नै नामबाट हीरा कम्पनी खोलेका थिए र हलिउड कलाकारहरू केट विन्स्लेट, डकोटा जोन्सन जस्ता कलाकारले उनका गहना मन पराएपछि उनले अन्तर्राष्ट्रिय पहिचान पाए । 

एजेन्सी