महोत्तरी, ५ फागुन– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले वाम गठवन्धन तोड्न र पार्टी एकता रोक्न आफ्नो पार्टी माओवादी केन्द्र र नेकपा एमालेलाई प्रलोभन र धम्की आइरहेको बताएका छन् । 

शनिवार महोत्तरीको हात्तीलेटमा आयोजित कार्यक्रममा बोल्दै प्रचण्डले गठवन्धनलाई असफल पार्न अहिले पनि षड्यन्त्र भइरहेको बताए । 

‘नेपाली जनताले वाम गठवन्धनबाट धेरै आषा र अपेक्षा गरेका छन् । तर यो गठवन्धनलाई तोड्न र पार्टी एकतालाई बिथोल्न विभिन्नखाले षड्यन्त्र भइरहेका छन्,’ प्रचण्डले भने, ‘पार्टी एकताको सवालमा एक–दुई जना नेताको भरमा मात्रै परेर हुँदैन । यसका लागि सबै नेता र कार्यकर्ताको सक्रिय सहभागिता हुनुपर्छ । हाम्रा कुनै पनि नेता र कार्यकर्ताहरु बिरोधीहरुको एम्बुसमा पर्नु हुँदैन ।’

प्रचण्डले पार्टी एकताको प्रत्रियाअन्तर्गत छलफल चलिरहेको उल्लेख गर्दै केही दिनमा निष्कर्शमा पुग्ने पनि बताए ।