धनगढी, ६ फागुन– डेढ दर्जनभन्दा वढी निर्णयहरु पारित गर्दै प्रदेश नं. ७ को मन्त्रिपरिषदको पहिलो बैठक आज (आइतवार) धनगढीमा सम्पन्न भएको छ ।

मुख्यमन्त्री त्रिलोचन भट्टको अध्यक्षतामा बसेको बैठकले विभिन्न नियमावली, विकास आयोजना, विभिन्न आन्दोलनमा वीरगति प्राप्त गरेका सहिदप्रति सम्मान व्यक्त गर्ने लगायतका निर्णय पारित गरेको हो ।

प्रदेश सरकारका प्रवक्ता तथा आन्तरिक मामिला तथा कानून मन्त्री प्रकाश शाहका अनुसार प्रदेश सरकार कार्यविभाजन नियमावली, कार्यसम्पादन नियमावली, सार्वजनिक लिखत प्रमाणीकरण नियमावली ०७४ स्वीकृत गर्ने निर्णय पारित गरिएको छ । त्यस्तै, उक्त बैठकले कानूनी मन्त्री शाहलाई सरकारकोे प्रवक्ता तोक्ने निर्णय समेत गरेको हो ।

भष्टचार विरुद्ध शुन्य सहनशिलता अपनाई सुशासन कायम गर्ने, राष्ट्रिय गौरवका आयोजनाहरुलाई अगाडी बढाउने, महाकाली लोकमार्ग, सेती लोकमार्ग र खुटिया फास्ट ट्¥याकलाई अगाडी बढाउने, पर्यटनको सम्भावनाको पहिचान गर्ने, कृषिको उत्पादत्व बृद्धि गर्न माटो परिक्षणलगायतका योजना ल्याउने निर्णय पारित भएको सरकारको प्रवक्ता शाहले लोकान्तरलाई जानकारी दिए ।

त्यस्तै, विकास आयोजनाहरुको अनुगमनको लागि प्रदेश स्तरीय अनुगमन संयन्त्रण निर्माण गर्ने, ‘ई–मोनिटरिङ सिस्टलम’ लाई प्रभावकारी बनाउने, जनयुद्ध, जनआन्दोलन, गणतान्त्रिक आन्दोलन, तराई मधेशलगायतमा भएका विभिन्न आन्दोलनमा वीरगति प्राप्त गर्ने सहिदहरुलाई श्रद्धाञ्जलीसहित सम्मान व्यक्त गर्ने निर्णय गरिएको छ ।