काठमाडौं, ७ फागुन– नेकपा एमाले र माओवादी केन्द्र पार्टी एकताको औपचारिक घोषणाको नजिक पुगेका छन् । 

आइतबार व्यापारी दुर्गा प्रसाईं निवासमा बसेको पाँच घण्टा लामो छलफल सहमति नजिक पुगेकोले सोमबार बस्ने एकता संयोजन समितिको बैठकबाट सहमति जुट्ने अनुमान गरिएको छ । 

सोमबार बिहान पार्टी नेताहरुसँगको छलफलमा पनि माओवादी अध्यक्ष पुष्पकमल दाहाल प्रचण्डले आइतवार एमाले अध्यक्ष केपी ओलीसँगको वार्ता सकारात्मक भएको बताएका छन् । 

यसअघि एमाले र माओवादीबीच जबज र २१ शताव्दीको जनवाद केलाई मार्ग निर्देशक सिद्धान्त राख्ने भन्नेमा विवाद भएको थियोे । तर आइतबार दुई अध्यक्षबीचको लामो छलफलपछि विवाद समाधान भएको प्रचण्डको भनाइ छ ।

‘दुई पार्टीबीचको सैद्धान्तिक समस्या समाधान भएको अध्यक्षले बताउनु भएको छ,’ बैठकमा सहभागी माओवादी नेता जनार्दन शर्माले भने,‘जबज र २१ शताव्दिको जनवाद र पार्टीको मार्ग निर्देश सिन्द्धान्तलाई बहसमा लागेर महाधिवेशनबाट हल हुनेछ ।’

दुई वर्षभित्र एकता महाधिवेशन गर्ने गरी अन्तरिम कालमा माक्र्सवाद–लेनिनवादलाई मार्गनिर्देशक सिद्धान्त मान्ने, तर महाधिवेशनमा टुंगो लगाउने गरी समझदारी बनेको छ ।

फागुन २ गते दुई पार्टी बीचमा सवै विषयमा कुरा मिलेको समाचारहरु सार्वजनिक भएको थियोे । तर संद्धान्तिक विषयमा कुरा नमिलेपछि तत्कालका लागि एकता रोकियो भन्ने समाचारहरु सार्वजनिक भएका थिए । त्यस लगत्तै माओवादीले एमाले अध्यक्ष केपी शर्मा ओलीलार्इं प्रधानमन्त्रीमा समर्थन गर्ने तर सरकारका सहभागी नहुने अडान लिएसँगै ओली अफ्ट्यारोमा परेका थिए । 

आइतबारको वान टु वान वार्तामा ओली र प्रचण्डबीच  पावर सेयररिङका बारेमा पनि कुरा मिलेको छ । दुई अध्यक्षबीच महाधिवेशन सम्म एकीकृत पार्टीमा समान हैसियतमा रहनेछन् । त्यस्तै राष्ट्रपति उपराष्ट्रपति, सभामुख, उपसभामुख लगायतका महत्वपूर्ण पदमा एमाले माओवादीबीच भागवण्डा मिलेको छ ।