नवलपरासी, ७ फागुन– नवलपसारीको पाल्हीनन्दन गाँउपालिका–१ महेशपुर भन्सारमा सोमवार विहान गोली चलेको छ । 

प्रहरी र स्थानीयबासीबीच झडप भएपछि प्रहरीले ४ राउण्ड अश्रुग्यासका साथै १ राउण्ड गोली प्रहार गरेको हो । 

प्रहरीले महेशपुर भन्सारबाट आयात गरिएको कपडा भैरहवा भन्सार पुर्याउन गाडीमा लोड गर्न थालेपछि स्थानीयले अवरोध गरेका थिए । 

गत माघ २८ गते प्रहरीले सीमानाकाबाट अवैध रुपमा आयात गरिएको ५१ पोका कपडा बरामद गरेको थियो । बरामद गरिएको कपडा भैरहवा भन्सार कार्यालयमा बुझाउन लैजान खोज्दा सोमवार स्थानीयले अवरोध गरेका हुन् । 

स्थानीयसँगै व्यापारीहरुको समूहले प्रहरीले कपडा लोड गरिरहेको गाडीमा ढुङ्गा–मुडा प्रहार गरेपछि स्थिति तनावपूर्ण बनेको थियो । 

स्थितिलाई नियन्त्रणमा लिन अश्रुग्यास र गोली चलाउनु परेको प्रहरीले जनाएको छ ।