धादिङ– पेट्रोलियम पदार्थ बोकेर काठमाडौं जाँदै गरेको एक ट्यांकर ठूलो दुर्घटना हुनबाट जोगिएको छ । 
पृथ्वी राजमार्गस्थित धादिङको सिम्लेमा गुडिरहेको  ना४ख ४६३९ नम्बरको ट्याकरमा एकाएक धुवाँको मुस्लो देखिएपनि स्थानीयको सक्रियतामा समयमै आगो नियन्त्रणमा लिइँदा सम्भावित ठूलो दुर्घटना टरेको हो ।  
सोमबार साँझ ट्यांकरको अगाडिको भागको  इन्जिनमा एकाएक आगलागी सुरु भई धुवाँको मुस्लो देखिएको प्रहरीले जनाएको छ । 
एकाएक गुँडिरहेको ट्यांकरमा धुवाँको मुस्लो देखिएपछि   स्थानीयबीच सम्भावित दुर्घटना हुन सक्ने भन्दै कोलाहल मच्चिएको थियो । त्रासका बीच पनि स्थानीयले  बाल्टी र ग्राग्रीमा पानी बोकेर  आगलागी नियन्त्रणमा लिएका थिए ।   स्थानीयको  करीब  १० मिनेटको सक्रियतामा आगो नियन्त्रणमा लिइएको र सम्भावित दुर्घटनाा टरेको बताइएको छ ।  

‘ट्यांकरभरी पेट्रोल रहेछ । यदी समयमै आगो नियन्त्रणमा नआई ट्यांकरभित्र रहेको पेट्रोल टिप्न  पुगेको भए ठूलो दुर्घटना हुन सक्थ्यो’, एक प्रत्यक्षदर्शीले भने, ‘धन्न त्यस्तो हुन पाएन ।’
 घटनास्थल पुगेको प्रहरीले आगलागी कसरी हुन पुग्यो भन्नेबारे छानबिन सुरु गरिएको जनाएको छ ।  

प्रहरीका अनुसार आगलागीलगत्तै चालक भाग्न सफल भएकाले उनीसुरक्षित रहेका छन् । तर ट्यांकरको अगाडिको भागमा नराम्ररी क्षति पुगेको छ ।  
बीच सडकमै एकाएक आगलागी सुरु हुँदा केहिबेर राजमार्ग अबरुद्ध समेत भएपनि अहिले सञ्चालनमा आएको छ  ।