काठमाडौं, ८ फागुन — उत्तर कोरियाले सोमवार अमेरिकाविरुद्ध अनेकौं आरोप लगाएको छ । उत्तरका अनुसार, अमेरिकाले दक्षिण कोरियासँग संयुक्त सैन्य अभ्यास शुरू गरेर दबाब बनाउने सोच राखेको र प्योङयाङ तथा
सउलबीच न्यानो बनिरहेको सम्बन्धमा बाधा उत्पन्न गर्न खोजेको छ ।

दक्षिण कोरियामा भएको शीतकालीन ओलम्पिक सकिनेबित्तिकै उत्तर कोरियाले यो आरोप लगाएको हो । 

सञ्चारमाध्यमहरूका अनुसार, सउल र वाशिङटनले शीतकालीन ओलम्पिक खेलसँग नजुधाउनका लागि वार्षिक सैन्य अभ्यास रोकेर राखेका छन् । त्यस्ता अभ्यास सामान्यतया मार्च र अप्रिलमा हुने गर्छन् । 

उत्तर कोरियाको दैनिक रोदोङ सिन्ममका अनुसार, ‘शीतकालीन ओलम्पिक खेल सकिनेबित्तिकै दुई कोरियाली देशबीचको सम्बन्धमा उत्पन्न न्यानोपनलाई अमेरिकाले बिगार्न चाहिरहेको छ ।’ खबरहरूमा अमेरिकाले खेल सकिनेबित्तिकै सैन्य अभ्यास शुरू गर्न चाहेको उल्लेख छ । 

दक्षिण र उत्तर कोरियाबीच धेरै वर्षसम्म तनावपूर्ण सम्बन्ध रहेकोमा यस वर्ष जनवरीमा दक्षिण कोरियाले आयोजना गरेको शीतकालीन ओलम्पिक खेलमा भाग लिनका लागि उत्तरले ऐतिहासिक सम्झौता गरेको थियो । उत्तरका सर्वोच्च
नेता किम जोङ–उनले आफ्नी बहिनी किम यो–जुङलाई उच्चस्तरीय प्रतिनिधिमण्डलका साथ खेल समारोहमा भाग लिन दक्षिण कोरिया पठाएका थिए ।

एजेन्सी