काठमाडौं, ८ फागुन — कृत्रिम बौद्धिकता अर्थात् आर्टिफिसियल इन्टेलिजेन्स (एआई) का विषयमा विज्ञहरूको फरक फरक धारणा छ । एकथरीले यसलाई मानवताका लागि आशीर्वाद मान्छन् भने अर्काथरीले यसलाई खतरा मान्छन् । 
वर्तमान समयमा एआई तीव्रताका साथ विकसित हुँदैछ र प्रविधि कम्पनीहरू स्मार्टफोनदेखि लिएर अन्य उत्पादनमा पनि एआई राख्न थालेका छन् । 

गूगलको स्वास्थ्य प्रविधिका केही वैज्ञानिकहरूले मुटुरोग तथा जोखिमहरू थाहा पाउने नयाँ तरिका खोजेका छन् । मशिन लर्निङमार्फत कुन व्यक्तिलाई कस्तो मुटुरोग लागेको छ भनी यसले पत्ता लगाइदिन्छ । 

यसअन्तर्गत सफ्टवेयरमार्फत रोगीको आँखालाई स्क्यान गरिन्छ र त्यहाँबाट तथ्यांक जुटाइन्छ । तथ्यांकमा व्यक्तिको उमेर, रक्तचापसँगसँगै उसले चुरोट पिउँछ कि पिउँदैन समेत हेरिन्छ । यस्ता तथ्यांकलाई यन्त्रले अध्ययन गरेर
व्यक्तिलाई हृदयघातको सम्भावना कति छ भन्ने देखाउँछ । अन्य तरिकाले मुटुरोग पत्ता लगाएजत्तिकै सटीक छ यो । 

गूगलका वैज्ञानिकहरूले विकसित गरेको यो एल्गोरिदममार्फत चिकित्सकहरूका लागि रोगीको कार्डियोभास्कुलर जोखिमलाई छिट्टो र सहज तरिकाले विश्लेषण गर्न सहायता गर्छ । यसका लागि रगत परीक्षण पनि गरिरहनुपर्दैन । 

अहिले यो परीक्षणकै चरणमा छ र पछि यसको प्रयोग गरिनेछ । 

गूगल आर्टिफिसियल इन्टेलिजेन्स ब्लगमा गूगल एआईका प्रोडक्ट म्यानेजर ली पेङ लेख्छन्, ‘दुई लाख ८४ हजार रोगीहरूबाट जुटाइएको तथ्यांकमा डीप लर्निङ एल्गोरिदम प्रयोग गरिएको छ र यसो गरेर हामीहरू रेटिनल
इमेजमार्फत हृदयघातको जोखिमलाई पूर्वानुमान गर्न सफल भयौं । यो सटीक पनि छ ।’

एजेन्सी