काठमाडौं, ८ फागुन — माल्दिभ्स द्वीपसमूहमा संवैधानिक संकटको स्थिति आएर संकटकाल लगाइएपछि यही महीना ११ वटा चिनियाँ युद्धपोतहरू पूर्वी हिन्द महासागर पुगेको एक चिनियाँ समाचार पोर्टलले जनाएको छ । 

डिस्ट्रोयरहरूको एक जत्था र कम्तीमा एउटा फ्रिगेट, ३० हजार टनको उभयचर ट्रान्सपोर्ट डोक र तीनवटा सपोर्ट ट्यांकरहरू हिन्द महासागर प्रवेश गरेको न्युन पोर्टल सिना डट्कम डट्सीएनले जनायो । 

उक्त जत्था कहिले र कति समयका लागि तैनाथ गरिएको वेबसाइटले बताएको छैन । 

यस क्षेत्रमा भारत र चीनबीच पुरानो शत्रुता छ । माल्दिभ्सका राष्ट्रपति अब्दुल्ला यामीनले बेइजिङको पेटी सडक परियोजनामा हस्ताक्षर गरेका छन् । यसअन्तर्गत चीनले एसिया र अन्त पनि व्यापार तथा पारवहन लिंकहरू बनाउँदैछ । 

भारतको माल्दिभ्ससँग दीर्घकालीन राजनीतिक र सुरक्षा सम्बन्ध छ । भारतभन्दा लगभग ४०० किलोमिटर पर रहेको माल्दिभ्समा चारलाख मानिस बस्छन् र तीमध्ये अधिकांश मुसलमान छन् । चीनले त्यहाँ आफ्नो उपस्थिति बढाउँदै गर्दा भारतले चीनलाई निस्तेज पार्ने प्रयास गर्दैछ । माल्दिभ्सका विपक्षी नेताहरूले नयाँ दिल्लीलाई हस्तक्षेप गर्न आह्वान गरेका छन् । 

चीनको रक्षा मन्त्रालयले यस विषयमा टिप्पणी गर्नका लागि गरिएको अनुरोधमा प्रतिक्रिया जनाएन । 

यामीनले फेब्रुअरी ५ मा १५ दिनका लागि संकटकाल लगाउँदै सर्वोच्च अदालतको आदेशलाई तुहाउने प्रयत्न गरेका छन् । सर्वोच्चले नौजना विपक्षी नेताहरूविरुद्धको अभियोगलाई खारेज गर्दै कारागारमा रहेका नेताहरूलाई मुक्त गर्न
आदेश दिएको थियो । उनले सोमवार संकटकाललाई ३० दिन थप लम्ब्याउनका लागि संसदीय समर्थन खोजेका थिए । 

एजेन्सी