महेन्द्रनगर, ८ फागुन– कञ्चनपुरकाे भीमदत्त नगरपालिकामा एक दर्जन भन्दा बढी कानून निर्माण गरिएका छन् । आधा दर्जन कानून निर्माण प्रक्रियामा छन् । संवैधानिक व्यवस्थाअनुसार स्थानीय सरकार सञ्चालन ऐन २०७४ का आधारमा नगर कार्यपालिकाले कानून बनाएको हो ।

नगरसभा र नगर कार्यपालिकाबाट १५ कानून पारित गरिएका छन् । ती सबै कानून स्थानीय राजपत्रमा प्रकाशित गरेपछि कार्यान्वयनको चरणमा प्रवेश हुने छन् । ती कानुनलाई राजपत्रमा प्रकाशित गर्ने तयारी थालिएको छ ।

भीमदत्तका मेयर सुरेन्द्र विष्टले स्थानीय सरकार सञ्चालन ऐन अनुसार नगर कार्य पालिका सञ्चालनका लागि आवश्यक कानून निर्माण गरिएको बताए । ‘संविधानमा स्थानीय सरकारको व्यवस्था छ, त्यस अनुसार स्थानीय सरकार सञ्चालन ऐन बनेको छ, त्यसमा टेकेर नगर कार्यपालिका सञ्चालनका लागि आवश्यक कानून बनाई रहेका छौ,' मेयर बिष्टले भने, 'केही कानून बनि सकेका छन्, केही निर्माण हुने प्रक्रियामा छन् ।’

भीमदत्तमा हालसम्म ऐन, नियमावली, निर्देशिका, कार्यविधि, आचारसंहिता गरी १५ कानून निर्माण गरिएका छन् । ती कानूनमा आर्थिक ऐन, विनियोजन ऐन, बैठक सञ्चालन कार्यविधि, नगर कार्यपालिका कार्य विभाजन नियमावली, नगर कार्यपालिका कार्यसम्पादन नियमावली, पदाधिकारीहरुका लागि आचारसंहिता, छाडा चौपाया नियन्त्रण तथा व्यवस्थापन निर्देशिका, टोल विकास संस्था गठन तथा सञ्चालन कार्यविधि, 'घ' वर्गका निर्माण व्यवसायीको नयाँ इजाजत पत्र जारी, नविकरण, नामसारी तथा खारेज गर्ने सम्बन्धी कार्यविधि लगायतका छन् ।

यसैगरी उपभोक्ता समिति गठन, सञ्चालन र व्यवस्थापन कार्यविधि, मदिरा बिक्री वितरण व्यवस्थापन तथा नियमन कार्यविधि, ज्येष्ठ नागरिक परिचयपत्र वितरण कार्यविधि, अल्पकालीन नगर सेवा सञ्चालन कार्यविधि, आधारभूत तहको परीक्षा सञ्चालन कार्यविधि निर्माण गरिएको छ ।

नगरपालिकामा शिक्षा सेवा सञ्चालन कार्यविधि, बजार अनुगमन निर्देशिका, एफएम रेडियो सञचालन तथा कार्यविधि, स्थानीय तहका सहकारी ऐन, घर बहाल लिने तिर्ने कार्यविधि, नगर प्रहरी सम्बन्धी विनियमावली निर्माण हुने क्रममा छन् । स्थानीय सरकार सञ्चाल ऐन २०७४ मा कार्यविधि, नियमावली, निर्देशिका नगर कार्य पालिकाबाट र ऐनहरु नगर सभाबाट पारित गराउन सकिने प्रावधान छ ।

फागुन २६ गते हुने दोस्रो नगर सभाबाट स्थानीय तहका सहकारी सञ्चालन लगायतका ऐन पारित गर्ने तयारी गरिएको छ । स्थानीय सरकार सञ्चालन ऐनको दफा २०७४ को १०२ को उप दफा ३ मा स्थानीय तहलाई कानुन बनाउने अधिकार दिएको छ । ती कानुन नगर प्रमुख (मेयर)ले प्रमाणकीरण गरेपछि राजत्रपत्रमा प्रकाशित गर्नु पर्ने व्यवस्था छ । भीमदत्त नगरपालिकाका प्रवक्ता राजेन्द्र पाण्डेयले नगरपालिकाको विधेयक समितिले कार्य पालिका बैठकमा पेश गरेपछि पारित हुने बताए ।