सुर्खेत, ९ फागुन–  प्रदेश नम्बर ६ को नेकपा एमाले संसदीय दलको प्रमुख सचेतकमा गुलावजंग शाह चयन भएका छन् । उनी सल्यान ‘क’ बाट निर्वाचित सांसद हुन् । 

शाहले सरकारमा रहेका मन्त्री, सांसद र संसद सचिवालयसँग समन्वय गर्नेछन् । यसअघि प्रदेश सरकारमा गुलावजंगको नेतृत्वमा एमाले सहभागी हुने भनिए पनि केन्द्रको दबाबका कारण अन्त्यमा उनी पछि हटेका थिए ।

को हुन् गुलाबजंग शाह ?

पिता रोमहर्ष बहादुर शाह र माता झरना शाहका सन्तानका रुपमा २०२२ सालमा सल्यानको बनगाड कुपिण्डे नगरपालिकाको घाँघरी पिपलमा जन्भिएका गुलावजंग शाह अनेरास्ववियु पाँचौको सदस्य बन्दै २०४० सालमा राजनीतिमा होमिएका थिए । विभिन्न जनवर्गीय संगठनमा रहेर काम गरिसकेको शाह सल्यानमा इमान्दार र लोकप्रिय नेताको रुपमा चिचिन्छन् । 

एमाले सल्यानको तेस्रो जिल्ला अधिबेशनबाट पार्टी जिल्ला सचिव बनेका शाह अहिले एमालेका केन्द्रीय सदस्य रहेका छन् ।

प्रमुख सचेतक नियुक्त भएपछि शाहले दलका सबै सांसद, मन्त्रीहरुसँग सहकार्य गर्दै अघि बढ्ने प्रतिक्रिया दिए । उनले लोकतन्त्रलाई अब्बल बनाउन आफूले भूमिका खेल्ने बताए । संसदीय व्यवस्थालाई थप बलियो बनाउँदै प्रदेश समृद्धिको यात्रामा अघि बढ्ने उनको भनाइ छ ।