जनकपुरधाम, ९ फागुन–प्रदेश नम्बर २ मा प्रदेश प्रमुख, मुख्यमन्त्री तथा मन्त्रीहरू चढ्ने गाडी पुरानो र थोत्रो भएकाले सवारी चलाउन समस्या भैरहेको ती सवारीका चालकहरूले गुनासो गरेका छन् । त्यसै पनि दुई नम्बर प्रदेशमा आवश्यक सवारी साधन अहिलेसम्म प्रदेशमा पुगिसकेका छैनन् भने अर्कोतर्पm पठाइएको गाडीहरू प्रयोग गर्दा कुनै पनि बेला दुर्घटना हुनसक्ने सम्मको चेतावनी ती सवारीका  चालकहरूले दिएका छन् । 

अति विशिष्ट व्यक्तिहरू (भीआईपी) को सवारी साधन बिग्रेको र थोत्रो भएका कारण मन्त्रीहरू समेत दुःखी भएका छन्  । प्रदेश नम्बर २ का मुख्यमन्त्री लालबाबू राउतले प्रयोग गर्ने प्राडो धेरै पुरानो र थोत्रो  भएकाले सवारी चलाउन धेरै नै कठिनाई भइरहेको उनका  चालक अर्जुन यादवले बताए ।  ‘भन्नका लागि त ल्याण्ड क्रुजरको प्राडो गाडी छ तर, गाडी सुरुमा स्टार्ट गर्न नै समय लाग्छ’, उनले भने, ‘गाडीको माउन्टेन खत्तम भएका कारण राउण्ड लिनु पर्ने लगायतका थुप्रै समस्याहरू रहेका छन् ।’
 

गाडीको पछाडिको लकरसमेत बिग्रिएको यादवले बताए । मुख्यमन्त्री राउतले हाल बा १ झ ७०९३ नम्बरको गाडी प्रयोग गर्दै आएका छन् । 

 चालक यादवका अनुसार उक्त गाडी १५ वर्ष पुरानो भएकाले अलिकति पनि स्पीड बढायो की समस्या आइहाल्ने गर्छ । उनी भन्छन्, ‘५० को गति लियो की गाडीमा आवाज आउन थाल्छ, प्रदेशको मुख्यमन्त्री जस्तो सरकार प्रमुखकै गाडी त अलि राम्रो हुनुपथ्र्यो । बस्ने आरामदायी सीट पनि छैन ।’

प्रदेश प्रमुखको गाडीको स्टेरिङ नै खराब !
प्रदेश प्रमुख रत्नेश्वरलाल कायस्थ चढ्ने गाडीको पनि समस्या उस्तै छ ।  प्रदेश प्रमुख कायस्थ चढ्ने बा १ झ ६४०७ नम्बरको गाडीको स्टेरिङ नै बिग्रेको  उनका चालक चित्रबहादुर श्रेष्ठले लोकान्तरलाई बताए । 

‘मोबिल हालेर जसोतसो चलाइरहेको छु, उनले भने, ‘गाडी मर्मत सम्भार गराउन भन्दै २६ माघमा काठमाडौंको टोयटा कम्पनीको एउटा ग्यारेजमा लगेर कोटेशन पनि मागेँ ।  तर, तत्कालै ठीक नहुने, अलि समय लाग्ने र साढे ५ लाख रुपियाँ खर्च पनि लाग्ने बताएपछि फर्किएको छु ।’ चालक श्रेष्ठका अनुसार प्रदेश प्रमुख कायस्थ चढ्ने गाडी सन् २००३ कै लटको गाडी हो । 
 

मन्त्रीहरूको गाडी पनि उस्तै 
भौतिक पूर्वाधार तथा विकास योजना  मन्त्री जीतेन्द्र सोनल चढ्ने गरेको गाडी पनि थोत्रो छ । मन्त्री सोनल ८ फागुनमा गृहजिल्लाबाट राजधानी जनकपुर फर्किंदै गर्दा बाटोमा नै गाडी बिग्रियो । मन्त्री सोनल भन्छन्, ‘म वीरगन्जबाट फर्किंदै थिएँ, बाटोमै गाडी बिग्रेर हैरानी भयो । ’
 

उनले थपे, ‘केन्द्रबाट नयाँ नया ँराम्रो गाडीहरू पठाइदिएको छु भनेर भनिए पनि पुरानै र थोत्रो गाडीहरू पठाइएको हुनाले के कति कारणले त्यस्तो भएको हो भन्ने कुरा हामीले थाहा पाउन सकेका छैनौं ।’