काठमाडौं १० फागुन–प्रधानमन्त्री केपी शर्मा ओलीले माओवादी केन्द्रका सांसदलाई समेत सहभागी गराएर मन्त्रिपरिषद् विस्तारको तयारी गरेका छन् । गएको बिहीवार शपथ गरेका ओलीले शुक्रवारसम्म मन्त्रिपरिषद् विस्तारको तयारी गरेका छन् । 

प्रधानमन्त्री ओलीले प्रतिनिधि सभा र राष्ट्रिय सभाका सदस्यलाई मन्त्री बनाउने तयारी गरेका एमाले स्रोतको भनाइ छ । तर संविधानमा संघीय संसदको सदस्य नभएको व्यक्तिलाई पनि मन्त्री बनाउन सक्ने व्यबस्था छ ।
 
संविधानको धारा ७८ मा राष्ट्रपतिले प्रधामन्त्रीको सिफारिशमा संघीय संसदको सदस्य नभएको कुनै व्यक्तिलाई मन्त्री पदमा नियुक्त गर्न सक्ने व्यबस्था गरिएको छ । 

सोही धाराको उपधारा २ मा त्यसरी नियुक्त भएको मन्त्रीले शपथ ग्रहण गरेको मितिले ६ महीनाभित्र संघीय संसदको सदस्यता प्राप्त गर्नुपर्ने व्यवस्था छ । 

त्यसरी नियुक्त भएको मन्त्रीले ६ महिनाभित्र संसदको सदस्य बन्न नसकेमा सो संसदको कार्यकलभरी मन्त्री बन्न नपाउने व्यबस्था संविधानमा छ । 

प्रधानमन्त्री ओलीले संसद सदस्यबाटै मन्त्री बनाउने तयारी गरेका छन् । राष्ट्रिय सभाका सदस्यद्वय माओवादीका रामबहादुर थापा र एमालेका तर्फबाट सिफारिश युवराज खतिवडा मन्त्री बन्ने चर्चा छ ।