काठमाडौं, १८ फागुन- आईसीसी विश्वकप क्रिकेट प्रतियोगिता छनोट चरणका खेल खेल्न नेपाली राष्ट्रिय क्रिकेट टोली अहिले जिम्बाब्वेमा छ । आइतबारबाट शुरु हुने प्रतियोगितामा नेपालले पहिलो दिन आयोजक जिम्बाब्वेको सामना गर्नेछ । समूह 'बी'मा रहेको नेपालले समूह चरणमा जिम्बाब्वेसहित अफगानिस्तान, स्कटल्याण्ड र हङकङसँग प्रतिस्पर्धा गर्नेछ । 

प्रतियोगिताका शीर्ष २ टोलीले आगामी सन २०१९ मा हुने विश्वकप क्रिकेट प्रतियोगितामा सहभागिता जनाउन पाउनेछन् । नेपालले भने विश्वकप सहभागिता भन्दा एकदिवसीय मान्यता पाउनुलाई आफ्नो प्रमुख लक्ष्य बनाएको छ । प्रतियोगितामा सहभागी ५ टोली (वेस्ट इण्डिज, जिम्बाब्वे, आयरल्याण्ड, अफगानिस्तान र नेदरल्याण्ड)सँग सो मान्यता प्राप्त छ, बाँकी ५ मध्ये ३ टोलीले आगामी ४ वर्षका लागि एकदिवसीय मान्यता पाउनेछन् ।

जिम्बाब्वेमा रहेका पारसले बीबीसीसँग कुराकानी गर्दै आफ्नो टेस्ट सपना सुनाएका छन् । साथै उनले विश्वकप छनोटमा उत्कृष्ट प्रदर्शन गर्दै आश्चर्यजनक नतिजा निकाल्ने बताएका छन् ।

पारसको टेस्ट सपना उनकै शब्दमा-

नेपाली क्रिकेटमा धेरै प्रतिभाशाली खेलाडीहरू छन् । हामीले धेरै अन्डर १९ क्रिकेट खेलेका छौं । अहिले टेस्ट खेलिरहेका देशहरूसँग पनि हामीले क्रिकेट खेलिसकेका छौं । टेस्ट मान्यता पाउनु हाम्रो ठूलो सपना हो ।

अफगानिस्तानले टेस्ट मान्यता प्राप्त गर्नका लागि गरेको अद्भुत यात्राका बारेमा हामीलाई थाहा छ । उनीहरूले त अझ हामीभन्दा पछि क्रिकेट खेल्न थालेका हुन् । अफगानिस्तान त जुनसुकै देशका लागि पनि उदाहरणका रूपमा रहेको छ । हामी पनि उनीहरू जस्तै अघि बढ्न चाहन्छौं ।

हामीले विश्वकप क्वालिफायरका लागि अफगानिस्तान, जिम्बाब्वे, हङकङजस्ता उम्दा टोलीसँग खेल्दैछौं । यो हाम्रा लागि सर्वोच्च खेलमञ्च हो । हामीले डिभिजन–२ मा राम्रो क्रिकेट खेलेका थियौं र यति परसम्म आउन सक्यौं । क्वालिफायरमा हामीले झन् राम्रा टीमहरूको सामना गर्दैछौं र यो हाम्रा लागि राम्रो अवसर हो ।

हाम्रा विपक्षीहरूलाई नै जित्ने दबाब छ । हामी त मैदानमा गएर आफ्नो प्राकृतिक खेल खेल्ने हो । हामी विश्वलाई नेपाली क्रिकेट पनि उदाउँदो छ भन्ने देखाउन चाहन्छौं । हामीसँग प्रतिभाशाली खेलाडीहरू छन् र आफ्नो सर्वोत्कृष्ट प्रदर्शनमार्फत आश्चर्यजनक नतिजा निकाल्नेछौं ।