बिराटनगर, २३ फागुन– मोरङको मिक्लाजुङ गाउँपालिका–७ मधुमल्लाको सिसौली टोल । टोलबाट अलि पर गंग्रे खोलाको किनार, सबैबाट टाढिएजस्तो एक झुपडी छ । बाँसले बेरेर पुराना जस्तापाताले छाएको यो झुपडी शान्ती तामाङ्गको ‘घर’ हो । 

केही दिन अगाडिसम्म यो घरमा बेग्लै चहलपहल हुन्थ्यो । टोलबाट टाढा भए पनि गाउँका मानिसहरु यो घरमा आइरहन्थे । शान्ति गाउँका लागि ‘गहना’ जस्तै थिइन् । गाउँमा हुने हरेक काममा शान्तिको उपस्थिति अनिवार्य जस्तै हुन्थ्यो । 

तर अहिले शान्तिको यो घर कुनै समसान जस्तो लाग्छ । मंगलवार लोकान्तरकर्मी पुग्दा शान्तिको घरको ढोका खुल्लै थियो । घरभित्र चामलका केही बोरा थिए, सामानहरु यत्रतत्र छरिएका । 

सिसौली टोल नजिकै आइवार साँझ शान्तिको शव भेटिएको थियो । सोही दिन विहान गाउँकै एक बालिकालाई गुन्यू–चोलो दिने कार्यक्रममा गएकी उनी साँझसम्म शव बनिसकेकी थिइन् । ढुङ्गाले किचेर अनुहारसमेत चिन्न नसकिने गरी छतविक्षत् अवस्थामा उनको शव फेला परेको थियो । 

हत्या भएकी शान्ती दास्रो विवाह गरेर मधुमल्ला पुगेकी हुन् । उनका पहिलो श्रीमान् नेपाली सेनामा काम गर्थे । पहिलो श्रीमानले अर्की श्रीमति ल्याएपछि बाध्य भएर उनले दोस्रो विवाह गरेकी हुन् । पहिलो श्रीमान्बाट उनकी एक छोरी छन् । 

दाइ पृथ्वी राईका अनुसार शान्ति गाउँ–घरमा असाध्यै मिल्ने स्वभावकी थिइन् । गाउँमा हुने प्राय सबै धार्मिक कार्यक्रममा उनको सहभागिता अनिवार्य जस्तै हुन्थ्यो । 

‘हत्या भएको दिन उनी विहानै गुन्यू–चोलो कार्यक्रममा गएकी थिइन्,’ शान्तिका दाइ पृथ्वीले सुनाए, ‘त्यही कार्यक्रममा गएका कसैले उनको हत्या गरेको हुनसक्छ ।’

शान्ती घरमै तानबाट ढाका बुन्थिन् । उनका श्रीमान गाउँ घरमा सुँगुरका पाठा किनेर बजारमा बिक्री गर्थे । उनका छोरा विशाल काठमाडौंमा सेक्युरिटी गार्डको काम गर्थे । १३ वर्षीया छोरी भने गाउँकै स्कूल पढ्छिन् । आमाको हत्या भएको खबर सुनेपछि विशाल पनि घर पुगेका छन् । 

पीडामाथि पीडा

शान्तिका आफन्तहरु उनको हत्यारालाई पक्राउ गर्न माग गर्दै इलाका प्रहरी कार्यालय मधुमल्लामा धर्नामा छन् । प्रहरीले बलात्कारपछि हत्या भएको हुनसक्ने बताएपछि आफन्तहरु झन क्रोधित बनेका छन् । नामजस्तै शान्त शान्तिको हत्या भएपछि अहिले गाउँ ने शोकाकूल बनेको छ । 

‘घटना भएको ३ दिन भइसक्दा पनि प्रहरीले हत्यारालाई पक्राउ गरेको छैन,’ शान्तिकी भाउजु उर्मिला राईले भनिन्, ‘बलात्कारपछि हत्या भएको भनिएको छ । यस्तो कुरा थाहा पाएपछि झन पीडा थपिएको छ । प्रहरीले अनुसन्धान गरिरहेका छौं मात्रै भन्छ ।’

सामूहिक बलात्कारपछि हत्या

प्रहरीले गरेको प्रारम्भिक अनुसन्धानबाट शान्तिको सामूहिक बलात्कार पछि हत्या भएको हुनसक्ने तथ्य पत्ता लागेको छ । ‘शरीरमा कुनै लुगा थिएन । अनुहार भरी ढुङ्गाले हानेर किच्चिएको थियो,’ घटनाको अनुसन्धान गरिरहेका इलाका प्रहरी कार्यालय उर्लावारीका प्रहरी नीरिक्षक चन्द्रबहादुर थापाले भने, ‘घटनाको प्रकृति हेदा मादक पदार्थ सेवन गरि बलात्कार गरेर उनको विभत्स हत्या भएको हुन सक्छ ।’ 

प्रहरीले शान्तिको शव गंग्री खोलामा फालिएको अवस्थामा फेला परेको बताएको छ । आइतवार मध्याह्न १२ बजेतिर शान्तिको हत्या भएको हुनसक्ने प्रहरी बताउँछ ।